Пашам пырля ышташ кутырен келшыме

Марий Эл Республик вуйлатыше Юрий Зайцев ден ПромСвязьБанк председатель Петр Фрадков паша вашлиймашым эртареныт, республикым социальный да экономике могырым вияҥдышашлан Марий Эл ден ПСБ коклаште пашам пырля ыштыме нерген соглашениеш кидпалым пыштеныт.

Соглашений почеш республик кумдыкышто жаплан келшыше банк инфраструктур вияҥшаш, кугыжаныш ден частник коклаште партнёр кылым ыштыме да кугыжаныш ден муниципал заказым обслуживатлыме сферыште пырля тыршыме негызеш банк национальный ден инвестиций проектлам шуктымашке ушнышаш.

Марий Эл вуйлатыше республикыш визит дене толмыжлан Петр Фрадковлан тауштен. «Банкын пашаштыже ик тӱҥ корно – тиде оборонно-промышленный комплекс предприятий-влак. Республикыштына кызыт 23 предприятий гособоронзаказым шукта. Элнан обороно куатшым кугемдышашлан нуно шке ӱмбакышт кугу нелытым налыныт, сандене полыш чынжымак кӱлеш», – каласен Юрий Зайцев.

Петр Фрадков банкын пашажым кӱкшын аклымылан да кылым кучаш келшымылан республик вуйлатышылан тауштен да каласен: «Регионал проектлам илышыш пурташ бизнес ден калыклан йӧным ыштыме шотышто ПСБ кугу опытым поген да полшаш эре ямде».

Марий Эл Республикым вуйлатышын администрацийжын информаций паша пӧлкажын уверже негызеш Ю.Исаков ямдылен