Элнан йӱдвел рӱдолаштыже ХI Петербург тӱнямбал газ форум эртен. Тушто Марий Элым вуйлатышын пашажым жаплан шуктышо Юрий Зайцев «Газпром» ПАО правлений председательын алмаштышыже Виталий Маркелов да «Газпром межрегионгаз» ООО-н генеральный директоржо Сергей Густов дене вашлийын.
Тушто республиклан 2021-2025 ийлаште газым ситарыме йодышым вияҥдыме программын пунктшым, тыгак Россий президент Владимир Путинын мланде участке марте газ пучым шупшмо шотышто кӱштымашыжым шуктымо йодышым каҥашыме. Республикыштына кок мероприятийжат графикым ончылтен шукталтеш. 2021 ийыште план почеш 650 мланде участке марте газ пучым шупшаш палемдыме улмаш гын, 716 участкыш шупшмо. А тенийлан 3345 палемдыме. Социальный газификацийым илышыш шыҥдараш 4061 сурт озанлыкыш пучым шупшаш 538 миллион теҥге окса кӱлеш.
Марий Эл правительстве населенный пунктлашке газ пучым шупшмо программым план почеш шукта. 2022 ий 1 январьлан республикыште 83,76 процент калык пӱртӱс газ дене пайдалана, пӱтынь Российыште – 73 процент.
2025 ий марте 17 кугу объектым чоҥаш палемдыме. Тудын кужытшо 260 километрыш шуэш. Тыге ешартыш 58 населенный пунктым газифицироватлаш йӧн ышталтеш. Тыгодым 14 котельныйым пӱртӱс газыш кусарат. Тидлан «Газпром» ПАО 4 миллиард утла теҥгем колта.
Сентябрь тӱҥалтыште У Торъял районысо Какшанмучаш селашке пӱртӱс газым пуртымо. Газопроводым срок деч тылзылан ончычырак чоҥымо. Тидыже 194 пӧртыш газым пурташ йӧным пуа. Тыште 1000 утла еҥ ила, тыгак икмыняр социальный объект уло.
Регионым вуйлатышын пашажым жаплан шуктышо Юрий Зайцев «Газпром» деч газификаций программым кумдаҥдаш йодын. Кызытсе жаплан ик эн кӱлешан йодышлан Килемар ден Юрино районлашке газ пучым шупшмо йодыш шотлалтеш. Тиде паша «Газпром» ПАО-н 2021-2025 ийласе программыж деке ешартыш проект кышкарыште шукталташ тӱҥалшаш.
Ончылгоч палемдыме почеш, проект паша 2023 ийыште тӱҥалшаш. Тиде проект илышыш шыҥдаралтеш гын, 10 тӱжем еҥ илыман 26 населенный пунктым пӱртӱс газ дене авалташ йӧн лиеш. Тыште 3983 сурт, Юрино ден Курыкмарий районлаште 7 котельный, Килемар ден Орашнке районлаште 1900 сурт шотлалтеш.
Республикнан йӱдвел кундемлажым пӱртӱс газ дене авалтымылан кӧра у производствым пашашке ушаш, илыш условийым саемдаш, у паша верым почаш йӧн ышталтеш. Килемар ден Юрино районлаште пӱртӱс газ укелан кӧра экономике кӱлеш семын ок вияҥ, нине кундемлашке инвестор-влак толаш огыт вашке.
Марий Эл Республикым вуйлатышын организаций да аналитике виктемжын уверже-влак негызеш В.СМОЛЕНЦЕВ ямдылен
