Марий Эл вуйлатыше Юрий Зайцев муниципал образований вуйлатыше-влак дене У ий деч ончыч видеоконференций йӧн дене совещанийым эртарен.
Тушто тудо каныш кечылаште еҥ-влаклан лӱдыкшыдымӧ лийме шотышто мом ышташ кӱлмӧ нерген ойлен.
Тыгак республиканский адресный инвестиционный программым ямдылыме да тудым илышыш пуртымо годым лекше неле йодыш-влакым каҥашеныт.
Совещанийыште торжественный ужашат лийын: Марий Эл вуйлатыше Россий Федераций правительстве председательын алмаштышыже Марат Хуснуллинын да чоҥымаш министр Ирек Файзуллинын лӱмышт дене «Оласе йырвелым йӧнаным ыштымаш» федеральный проект дене келшышын Всероссийский йӱклымашым эртарымашке чолган ушнышо волонтер-шамычлан тауштыман серышым кучыктен. Иктыжым – Республикын волонтер-влак корпусшын вуйлатышыже, Самырык-влакын полатыштын «Марий Элыште добровольчествым поддержатлыме ресурс рӱдерын» отделжын кугурак специалистше Мария Ямбаковалан. Тудо Россий Федераций правительстве председательын алмаштышыже Марат Хуснуллинын лӱмжӧ дене тауштымаш серыш дене палемдалтын. РФ чоҥымаш министр Ирек Файзуллинын лӱмжӧ дене серыш-влакым Юрий Зайцев Козьмодемьянскыште добровольчестве муниципал рӱдер вуйлатыше, «Козьмодемьянск ола» ола округышто волонтер-влакын муниципальный штабыштын координаторжо Мария Жаровалан да волонтер-влак Мария Дороговалан, Юлия Крючковалан, Сергей Михайловлан, Данил Сидоровлан, Артем Якимовлан да Галина Долговалан кучыктен.
Марий Эл вуйлатышын администрацийжын информаций паша пӧлкажын уверже негызеш Л.Камалетдинова ямдылен
