Ойпидыш уло – паша вияҥеш

Марий Эл – Юл кундем федерал округышто искусственный интеллектын аспектше-влакым практикыште кучылтшо икымше регион-влак кокла гыч иктыже.

Тиде кечылаште регионым вуйлатыше Юрий Зайцев ден Сбербанк ПАО-н Марий Элысе пӧлкажын управляющийже Максим Бауков искусственный интеллект, цифран да ESG-трансформациян технологийлам вияҥдыме сферыште вашкыл шотышто ойпидышым ыштеныт. Ты документын тӱҥ шонымашыже – республиклан пайдам кондышо сай качестван технологийым да сервисым ышташ.

Российыште искусственный интеллектым чолган вияҥдаш кӱлмӧ шотышто элнан президентше Владимир Путин ӱжын. Тудын шонымашыже почеш, у технологий-влак илышын чыла сферышкыже пурат да умбакыже шыҥдаралташ тӱҥалыт.

Тений июньышто Марий Элым вуйлатыше республикысе исполнительный, верысе кучемын органже-шамычым вуйлатыше-влаклан регионышто цифран трансформаций темылан мероприятийым эртарен. Дизайн-сессийын иктешлымашыже почеш, ныл эн тӱҥ проектын переченьыштым ямдылыме.

Юрий Зайцев Россий Сбербанк ПАО-н  дене вашкылым вияҥдыме шотышто ойлен.

«Республик правительствын пашаже дене кылдалтше шуко процессым Сбербанкыште кучылтмо тачысе кечылан келшыше йӧн дене эркын дене вияҥдынена. Ойпидышыш кидпалым пыштыме деч вара каҥашена, тӱрлӧ мероприятийым эртарена да кӱлеш решенийым луктына», – палемден тудо.

Максим Бауков кызытсе технологийым вуйлатыме пашаш, экономике отрасльыш шыҥдараш йӧным ышташ ямде улмыж нерген ойлен. «Регионым вуйлатышын шке позицийжылан кӧра Марий Эл  искусственный интеллектын аспектше-шамычым практикыште кучылтмо шотышто Юл кундем федерал округысо икымше регион-влак кокла гыч иктыжлан шотлалтеш. Корно кужу, сандене шонымашыш шуаш манын, ик ошкыл почеш весым ыштыман», – каласен тудо.

Марий Эл Республикым вуйлатышын администрацийжын информаций паша пӧлкажын уверже негызеш Г.Кожевникова ямдылен