Ончыл радамыште улына

Марий Эл вуйлатыше Ю.Зайцев «Армий ден обществе. Кугыжаныш обороным пеҥгыдемдышаш верч ведомство-влак кокласе вашкыл» ведомство-влак кокласе IХ шанче-практике конференцийыште лийын.

Мероприятийыш РФ субъектын, кугыжаныш кучем орган-шамычын, научно-шымлыше организацийын, военный ден гражданский туныктымо заведенийын, ОПК предприятийын, мер организацийын вуйлатышышт ден должостной еҥже-влак погыненыт.

РФ Обороно министрын алмаштышыже Н.Панков конференцийым почмыж годым ведомство-влак коклаште кылым вияҥдыме у йӧным, тачысе кечылан келшен толшо технологий куатым кучылтмо, ведомство-влак коклаште кугыжаныш обороно йодыш шотышто пашам ыштыме системыште организационный ден правовой вашталтышым пуртымо нерген каласен.

Юл кундем федерал округышто РФ Президентын полномочный представительже И.Комаров округышто самырык тукымым патриот шӱлышеш воспитатлыме шотышто могай паша ышталтме дене палдарен. Ты сомыл «Георгиевский тасма», «Курымашлык полк» мер проектла, Россий Обороно министерствын полшымыж дене эртаралтше «Шарнымаш сорта», «Сеҥымаш поезд», «Салтаклан серыш» мероприятийла кышкарыште ышталтеш.

Марий Элыште военно-патриотический воспитаний пашам «Граждан-влакым патриот шӱлышеш шуарымаш да самырык тукымым сарзе службылан ямдылымаш» 2016-2025 ийлан республикысе кугыжаныш программе полшымо дене илышыш шыҥдарат.

Тӱрлӧ военно-патриотический мероприятийыш ушнышо еҥын чотшо 120 тӱжемышкат шуэш. Марий кундемыште патриот шӱлышеш куштышо вич рӱдер пашам ышта.

Республикна РФ Президент В.Путинын «Авангард» рӱдерым ыштыме кӱштымашыжым ик эн ончыч да сайын шуктышо 10 регион коклаш пурен.

Кундемыштына военно-патриотический ушем-влак чолган вияҥыт. 100 кадет классыште 2286 йоча тунемеш, 105 военно-патриотический клубыш 3015 икшыве коштеш.

Марий Элыште 153 юнармий отряд уло. Тушто ныл тӱжем йоча шотлалтеш. Республикысе 17 муниципал образованийыште «Юнармий» мер толкын пашам ыштат. Марий Элын правительствыже «Юнармий», «Российын кычалше толкынжо», «Сеҥымашын волонтёржо-шамыч» ушем-влаклан, ветеран организаций-шамычлан кугу полышым пуа.

Республикна РФ субъект-влак коклаште 8 гыч 18 ияш марте йоча-шамычым юнармий толкыныш ушышо регионла коклаште 11-ше верым налеш.

2016 ий сентябрь гыч «Паллада» парус клуб пашам ышта. Тушко 8 гыч 16 ияш марте 100 икшыве коштеш.

Марий Элыште самырык тукымым военно-патриотически шӱлышеш куштымо пашам сайын виктарымылан кӧра Российыште да Юл кундем федерал округышто ик эн ончыл верым налаш йӧным пуат.

Марий Эл Республикым вуйлатышын администрацийжын информаций паша пӧлкажын уверже негызеш Л.ШАБДАРОВА ямдылен