Марий Эл вуйлатыше Ю.Зайцев Юл кундем федерал округысо самырык тукымын «iВолга» форумыштын организаторышт ден тушко мийыше-шамыч дене вашлийын.
Мероприятий Самара областьыште эртен. Тушко элна гыч кок тӱжем утла ӱдыр-рвезе чумырген. Марий Элын делегацийыштыже 90 наре еҥ лийын. Форумышто 11 тӱрлӧ тренинг смене пашам ыштен. 2023 ийыште Марий Эл «Миссия доброТЫ» добровольческий сменын организаторжо лийын. Кундемнан еҥже-влак тӱрлӧ грант конкурсыш ушненыт, финалыш лектыныт, сеҥеныт.
«iВолга» форум – россий кӱкшытан мероприятий. Те тушто проектдам сайын ончыктенда, икмыняр грантым сеҥен налында. Республиклан тыгай мероприятийыш ушнымыда пешак кӱлешан. Марий Эл молодёжный политике шотышто Российыште кокымшо верым налеш. Умбакыжат ончыко каяш, кушкаш, шке шонымашым илышыш шыҥдараш тыланем. А ме тыланда полшаш тӱҥалына», – каласен Юрий Зайцев.
Погынышо-влак республикым вуйлатышылан форумыш миен коштмышт, проектышт нерген каласкаленыт, полышлан тауштеныт.
Юрий Зайцев «iВолга» форумышто лийше регионысо командылан таум каласен да награде-влакым кучыктен.
Марий Эл Республикым вуйлатышын администрацийжын информаций паша пӧлкажын уверже негызеш Л.ШАБДАРОВА ямдылен
