Олмыкташ полыш лиеш

Олмыкташ полыш лиеш
19.07.2021

Марий Эл вуйлатыше А.Евстифеевын кӱштымыж почеш, шапаш фонд гыч Волжсклан аварийный ситуацийым кораҥдаш 16 миллион теҥгем ойырат.

Ты оксам Волжск оласе Кузьмин уремысе канализаций коллекторым да 6-шо №-ан школ оралтын кумшо блокшым олмыкташ кучылтшаш улыт.

Республикын Чоҥымо паша, архитектур да илыме вер ден комммунал озанлык министерствыштыже умылтарыме почеш, коллекторым олмыктен шуктат гын, 25 тӱжем еҥым авалтыше «Заря», «Центральный», «Строитель» микроорайонлаште подвал пӧлем-влак вӱдышто шинчаш огыт тӱҥал. Тидлан 10,8 миллион теҥге ойыралтеш.

6-шо №-ан школын кумшо блокшым олмыктымеке, тушто 1 сентябрь гычак тунемаш тӱҥалаш лиеш да 1-4 класслаште тунемше-влакым яра шокшо кочкыш дене пукшаш тӱҥалыт. Тидлан 5,5 миллион теҥгем ойрымо. 

Марий Эл вуйлатышын организаций да аналитике виктемжын уверже негызеш С.Носова ямдылен