Нунын деч поро уверым гына вучат

Нунын деч поро уверым гына вучат
20.07.2021

Марий Эл вуйлатыше А.Евстифеев Россий почто кечылан пӧлеклалтше  торжественный мероприятийыште лийын.

«Российын почтыжо Европыштыжат ик эн ончыч ышталтын. Виян толмо жапыште тудо кугыжаныш инфраструктурын пеш кӱлешан ужшышкыже савырнен. Россий президентат палемден: «Почто, мутат уке, системым ыштыше отрасльлан шотлалтеш: тудо ыштен, ышта да эре ышташ тӱҥалеш, пандемий жапыште гына огыл». Чыла нине шомак Марий Элысе почто пашаеҥ-влакланат келшен толыт. Вет пандемий жапыштат нуно кӱрылтде шке пашаштым шуктат», – каласен регион вуйлатыше.

Александр Евстифеев почто службын виян толмыжым палемден. Услугым пуымо спектрже кумдаҥеш, инфраструктур вияҥеш, йӧнан цифр сервис-влак ышталтыт. Почто пашаеҥ-влак илалше-шамычлан услугым пуымо пашам саемден толыт. 695 почтальон 1402 ял шотан илемыш йолын коштыт. Кодшо ийын почтовик-влак 10 миллион серыш ден бандерольым, 600 тӱжем посылке ден пакетым, 7 миллион экземпляр газет ден журналым еҥ-шамыч деке намиен шуктеныт. Чылаже Марий Элыште 257 почто отделений пашам ышта, тушто 1700 еҥ тырша.

«Почтальон-влакым верлаште эре поро увер дене вучат. Почто калык деке лишкырак лияш тырша. Кодшо ийын гына Волжский, Морко, Шернур, Звенигово районаште ныл ял отделенийым почмо. Регион вуйлатыше почтовик, ветеранже-влакым саламлен да сай пашаштлан тауштен. Мучашлан  ончылъеҥже-влаклан кугыжаныш наградым кучыктен. Тыге, Марий Эл Правительствын Чап грамотыж дене почтальон Зинаида Кавказина, Морко почтамтым вуйлатыше Олег Кузнецов да связь оператор Надежда Порфирьева палемдалтыныт. «Россий почто» акционер обществын Самара областьысе федерал почто связьын Юл макрорегионын директоржо Александр Вакуленколан «100-летие образования Марий Эл» шарнымаш медальым кучыктен. 

Марий Эл вуйлатышын организаций да аналитике виктемжын уверже негызеш С.Носова ямдылен