«Нуно эреак мемнан дене пырля улыт»

«Нуно эреак мемнан дене пырля улыт»
04.08.2017
2 август – Юж-десант войскан кечыже. Тений Йошкар-Олаште тудо поснак кумдан да кугу кӱкшытыштӧ эртаралте.
 
Эрдене 9 шагатлан Воинский Чап мемориал ансамбль деке Марий Эл вуйлатышын пашажым шуктышо Александр Евстифеев ден Россий президентын Юл кундем федерал округышто полномочный представительже Михаил Бабич, ятыр моло пеледыш аршашым пыштышт.
 
Тылеч вара Сеҥымаш бульварыште Российын Геройжо Марк Евтюхинлан бюстым почыч. Тушко моткочак шуко калык погынен ыле. Мутат уке, утларакше десантник-влак лийыныт.
 
Погынышо-влакым ВДВ кече дене саламлышыжла, Михаил Бабич палемдыш:
 
- Сар йомдарымаш деч посна ок лий. 104-ше парашютно-десантный полкын 6-шо ротыжын подвигше мемнан элын, Вооруженный вийын историйышкышт ӱмырешлан «шӧртньӧ буква» дене возалтын. Кредалмаште вуйыштым пыштыше-влакын ача-авашт ончылно ме вуйнам савена. Эргым, пелашым, лишыл еҥым йомдараш кузе чот йӧсӧ улмым ме умылена. Но нуно эреак мемнан стройышто улыт. Шке примерышт дене нуно тӱжем дене самырык еҥым патриот семын кушташ полшат.
 
Саламлымашыжым полпред десантник-влакын девизышт дене мучашлыш: «Мемнан деч моло нигӧ!» Вет Михаил Бабич шкежат десант войскаште службым эртен. Тылеч вара погынышо десантник-влак тиде девизым эше икмыняр гана кугу йӱкын кычкыральыч.
 
Александр Евстифеев тыге ойлыш:
 
-  Чыладамат Юж-десант войска кече, мужество, патриотизм пайрем дене саламлем. Марий Эл Республик шке Геройжо дене кугешна, ме тыште илыше-влак Российын патриотшо улыт манын ончыкташ погыненна. Эргыштым мемнан илышна верч пуымыштлан чыла ава-влак ончылно вуйнам савена.
 
Но кунам Россий Геройын аваже Лидия Ивановна Евтюхина ойлаш тӱҥале, тудым кумыл тодылтде, очыни, иктат колышт ыш керт – тунар чонеш логалшын каласыш:
 
- Мыланна, эргым йомдарыше ава-влаклан, икшывына нерген эртыше жап дене ойлаш моткоч неле. Жап эмла, маныт. Уке, огеш эмле. Аван чонжо эре шортеш…Батальон командир Марк Евтюхин дене салтакше-влак чыланат кызыт каваште парад стройышто тендан ончылно пырля улыт манын ӱшанем… Ме нунылан тыге каласышаш улына, шонем:
 
«Спасибо вам за ваш великий подвиг,
За честь страны, что так нам дорога.
За то, что, долг свой до конца исполнив,
Отечество спасли вы от врага».
 
Бюстым почмашке 6-шо ротышто служитлыше, тушто вуйыштым пыштыше, тыгак Афган ден Чечня сарлаште ӱмыр лугыч лийше-влакын авашт ден лишыл еҥышт толыныт ыле. (Вараже нунын дене А.Евтифеев ден М.Бабич посна вашлийын мутланеныт – авт.)
 
Тиде пайремыш РФ Юж-десант войскан командующийжын алмаштышыже  Владимир Кочатков толын ыле. Тудын да Россий десантник-влак ушемын региональный отделений вуйлатышыже Марсель Фаткуллинын саламлымышт деч вара Марк Евтюхинлан бюстым почыч. 
 
Гвардий подполковник Марк Евтюхиным да 6-шо ротын десантникше-влакым шарныме лӱмеш чыланат ик тат шып шогышт, вара погынышо-влак кокла гыч шукынжо бюст деке пеледыш аршашым пыштышт.
 
Тиде пайремыштак 33 рвезе ден ӱдырым юнармеец-влак радамыш пуртышт. Элым ӱшанлын аралаш клятвым пуымекышт, нунылан I-V шеренге значокым кучыктышт.   
 
Кечывал деч вара правительстве пӧртыштӧ военно-патриотический йодышлан пӧлеклалтше совещаний эртыш.
 
Марий Эл Республик Вуйлатышын мер кыл ден увер виктемже
Кусарымаш - Л.Камалетдинова (газет "Марий Эл")