Марий Эл вуйлатышын кӱштымыж почеш, СВО-н участникше-шамычын пелашышт ден аваштлан «Кичиер» санаторийыште канаш сменым ыштат. Тудо 12 гыч 25 сентябрь марте шуйна.
Тыге Волжский районысо сылне вер-шӧран ер воктене, санаторийыште, 150 ӱдырамаш кок арня каналтен, капкылыштым пеҥгыдемден кертеш.
Регион вуйлатыше Юрий Зайцевын полышыж дене Марий Эл Паша да социальный полыш министерстве специальный военный операцийын участникше-влакын пелашышт дене аваштлан «Моторлык тӱням утара» программан каныме да тазаҥдыме сменым эртара.
Санаторийыште кок пачашан корпусысо пӧлемлаште илаш сай йӧным ыштеныт. Каныше-влакым кечеш вич гана пукшаш тӱҥалыт, медицине полышым пуат. Кумылан-шамыч эмлыме физкультур, грязелечений, массаж дене пайдаланен кертыт.
Санаторийыште ӱдырамаш-влаклан тӱрлӧ тренингым, йога дене занятийым эртарат. Усталык мастер-классат лиеш. Адакшым косметолог-шамычын полышыштат яра пуалтеш.
Марий Эл Республикым вуйлатышын администрацийжын информаций паша пӧлкажын уверже негызеш Елена Эшкинина ямдылен
