Мо коеш? Канде тӱсан автобус!

Марий Эл вуйлатыше Юрий Зайцевын инициативыж почеш республикышкына 40 у автобусым кондат. Шымытше «Троллейбус транспорт» предприятийын паркшым ешарен, молыжым ноябрь мучаш марте конден шуктат.

Тӱшка калыкым шупшыктышо транспортым ситарыме йодыш кызыт марте пӱсын шоген. Пытартыш жапыште сай могырыш вашталтыш шижалтеш. Тений у, чыла шотыштат йӧнан 50 автобусым, а тылеч ончыч 10 троллейбусым налме.

Канде тӱсан автобусыш 55 еҥ шыҥа, 17 шичме да тыгак инвалид-влаклан келыштарыме верла улыт. Пурымо-лекме кумдык лапка улмылан кӧра моткоч йӧнан.

Республик вуйлатышын кӱштымашыжым шуктен, транспорт да корно озанлык министр Александр Герасименко у автобус-влакым терген. Тидын годым ушештарен: тӱшка транспорт шотышто шукын вуйым шийыныт, Марий Эл вуйлатыше пассажир-влакым шупшыктымо пашам кӱлеш семын виктарен колташ задачым шынден.

 

Марий Эл Республикым вуйлатышын администрацийжын
информационный паша пӧлкажын уверже негызеш
Л.СЕМЕНОВА ямдылен