Медведево поселкылан 300 ий темын.
Тиде лӱмгече дене тушто илыше ден уна-влакым Марий Эл вуйлатыше Юрий Зайцев саламлен.
Тудо палемден: «Медведево – жап дене тӧр кайыше, писын вияҥше, сай инфраструктуран поселко. Тудо умбакыжат уэмдалт вашталтеш. Ӱмаште майыште «Ясная Поляна» илыме комплексыште Сеҥымашлан 75 ий темме лӱмеш бульварым чоҥаш тӱҥалме. Тӱшкан пайдаланышаш ты кумдыкышто канаш, спорт дене кылым кучаш, модаш вер-влак, велокорно, ужалыме киоск-шамыч лийыт. «Оласе йӧнан средам ыштымаш» национальный проект дене келшышын рӱдӧ паркым да Юбилейный площадьым тӱзатыме. Пытартыш ийлаште чылаже 5 километр кужыт корным тӧрлымӧ, 825 верлан школым, 2 йочасадым чоҥымо, у рӱдӧ книгагудым нӧлташ тӱҥалме». Умбакыже каласен: «Тушто илыше-влаклан поселкым вияҥдымашке надырым пыштымыштлан да шочмо кундемыштлан ӱшанле улмыштлан тауштем. Медведево поселкышто илыше-влаклан пеҥгыде тазалыкым, пиалым, кеч-могай пашаштат сеҥымашыш шуаш тыланем. Пайрем дене, шергакан йолташ-влак!»
Медведево поселкылан 300 ий темме лӱмеш пайремым 26 августышто палемденыт. Тиде кечын поселкышто илыше ден уна-влаклан тӱрлӧ ярмиҥга, пеледыш выставке, кидмастар-влакын «Мыйын кидем шӧртньӧ» паша ончерышт, «Палыме уремла мучко эртена» фотовыставке, «Медведево – тиде мый» квест, шовын шоҥ шоу, «Мыйын поселкем – мый муро да легенде», концерт программе эртаралтыныт. Тыгак «Мый Медведево поселкым йӧратем» фотографий ден видеосаламлымаш конкурсышто сеҥыше-влакым саламленыт. Кумылан-шамыч «Сам себе режиссер» программыште 10 гана сеҥыше Игорь Игнатьевын выступленийжым, тыгак «Чебурашка», «Вызов», «Праведник» фильм-влакым ончен кертыныт. Тиде кечынак еҥ-влаклан Г.Гибадуллин лӱмеш мини-зоопаркышкат цирк представленийым ончаш йӧн пуалтын.
А спорт дене кылым кучышо-влак «Олимп» стадионышто шке вийыштым кушто гына терген кертын огытыл?! Пӧръеҥ ден ӱдырамаш-влак, посна командылашке чумырген, пляжный да классический волейбол дене модмаште таҥасеныт, регби, баскетбол, йоча-шамычлан кудывече футбол дене турнир-влак, скандинав коштмаш дене таҥасымаш лийыныт. Кӧ куштылго атлетикым йӧрата гын, тудо «Вести» газетын призше верч поселкын уремлаж мучко куржын эртен кертын.
Пайремыш погынышо-влаклан ик эн чот Йошкар-Оласе ДОСААФ-ын парашютистше-шамычын показательный выступленийыштым ончаш келшен, очыни.
Л.Камалетдинова
