Мастар лияш сай йӧн

24-26 мартыште Йошкар-Олаште Марий Эл вуйлатышын призше верч дзюдо дене Россий кӱкшытан турнир эртен.

Таҥасымаште элнан 22 регионжо гыч спортсмен-шамыч вийыштым тергеныт. Вашпижмашке 160 участник лектын.

Тыгай турнир республикыште 1991 ий гыч эртаралтеш.   

Регион вуйлатыше спортсмен, уна-влакым шокшын саламлен. Икымше верым налше-шамычлан Российын спорт мастерже нормативым шукташ йӧн улмым ушештарен.

– Дзюдо дене кылым кучышо-шамычын сай результатышт дисциплине, пеҥгыдылык дене кылдалтын. Участник-влаклан вий-куатым, чытымашым, тале соперникым, сеҥымашым, шке шонымашышкышт шуаш тыланем, – манын регион вуйлатыше Юрий Зайцев. Тудо тыгак дзюдо дене Россий кӱкшытан турнирым эртарыме йӱла Марий Элыште аралалтеш, эртаралташ тӱҥалеш манын палемден. Ю.Зайцев вашпижмашым ончен, «Федерация дзюдо России» общероссийский мер организацийын президентше Сергей Соловейчик дене вашлийын, регионышто спортын ты видшым вияҥдыме нерген каҥашен.

Тиде турнирын сеҥышыже-влак грамот, кубок, медаль да шарнымашан пӧлек дене палемдалтыныт.

Шке тӱшкаштышт икымше верым Д.Зотеев (Пермь, 81кг.), Д.Аханов (Татарстан, 90 кг.) налыныт.


Марий Эл Республикым вуйлатышын администрацийжын информаций паша пӧлкажын уверже негызеш Е.Эшкинина ямдылен