Марий Элын опытшым Путин сайлан шотлен

Марий Элын опытшым Путин сайлан шотлен
20.07.2017
Теҥгече Марий Элыште моткочак кугу событий лие - Россий Президент Владимир Путин Йошкар-Олашке кокымшо гана толын кайыш.
 
Ты гана тудо Президент пеленсе Калык-влак кокласе кыл шотышто Советын заседанийжым эртараш толын.
 
Йошкар-Олашке вертолет дене чоҥештен толмекше, Владимир Путиным эн ончычак Т.Е.Евсеев лӱмеш национальный тоштер дене палымым ышташ наҥгаеныт. Эл вуйлатышым кӱслезе ӱдыр-влак сылне марий калык семым шоктен вашлийыныт. Тоштер дене палдарымаште Марий Эл вуйлатышын пашажым шуктышо Александр Евстифеев лийын.
 
Тылеч вара чыланат Изи Какшанын вес серышкыже вонченыт. Тысе Набережная Брюгге уремыште верланыше ик полатыште, жаплан чумырымо Ситуационный рӱдерыште, 16 шагатланрак заседаний тӱҥале. Мутланымаште  тӱҥ верыште Россий Федерацийын кугыжаныш национальный политикыжын стратегийжым 2025 ий марте регион да муниципал кӱкшытыштӧ шуктымаш йодыш ыле.
 
Советын пашашкыже РФ президентын администраций вуйлатышыжын пашажым шуктышо Сергей Кириенко, тудын алмаштышыже Магомедслам Магомедов, Россий образований министр Ольга Васильева, тӱвыра министр Владимир Мединский, РФ президентын Юл кундемыште полномочный представительже Михаил Бабич, Марий Эл вуйлатышын пашажым шуктышо Александр Евстифеев, «Российысе марий-влакын федеральный национально-культурный автономийышт» мер организацийын Советшын председательже Лариса Яковлева да   Российыште немыч, корей, поляк, украин, грек, Кавказ калык, татар, икмыняр моло национальный сообществе-влакын вуйлатышышт чумыргеныт ыле. Мутланымаш кум шагат наре шуйныш. Погынышо-влак кокла гыч шукынжо ончыкылыклан шонымашышт да темлымашышт дене палдарышт. Нунын коклаште Лариса Яковлева ыле. Тудо ойжым Владимир Владимирович да погынышо-влак дене марла саламлалтын да пашашт ушнаш тыланымаш дене тӱҥале. Лариса Николаевна республикыштына марий йылмым туныктымо, могай марий организаций-влак улмо, нунын могай пашам шуктымышт, могай пайрем-влак эртаралтме да кундемыштына тӱрлӧ калык дене ваш келшен илыме нерген каласкалыш. А Марий Элыште тӱрлӧ верам кучышо 150 религиозный организаций регистрироватлалтын. Моло ойлышо-влак шке кундемышт да калык кокласе кыл шотышто могай паша ышталтме, могай сӱрет палдырныме, мом ышташ шонымышт дене палдарышт. Президент чыла ойлымо ден темлымашым шотыш налына, шукыжым, поснак келшен толшыжым, мутат уке, вигак огыл, но лийме семын илышыш пурташ тыршена манын палемдыш.  
 
Заседаний деч вара Россий президент ден Марий Эл вуйлатышын пашажым шуктышо Александр Евстифеев вашлийыныт. Республикын кызытсе ситуацийже дене палдарымыж годым Александр Александрович изи пашадар тӱлалтме нерген каласен. Тидлан кӧра самырык-влак кундем гыч каят, сандене тыгай сӱретым чараш кӱлеш манын. Йочасадлаште вер ситыдыме йодышат пӱсӧ манын палемден да ты чырым кораҥдышашлан мом ышташ шонымыж дене палдарен. Тыгодым республикыште сай вашталтыш-влак лияш тӱҥалме нергенат ойлен. Мутлан, пашадар парым Марий Элыште кызыт уке манын каласен.  Александр Евстифеев республикын изи огыл парымже, тыгак социальный сферыште, образованийыште, здравоохраненийыште мо ышталтме гыч эн тӱҥжӧ нерген каласкален, корно йодыш денат палдарен. Икманаш, республикын кызытсе илышыж нерген Александр Александрович Владимир Путиным тӱрыс гаяк  палдарен шуктен. Владимир Владимирович шкеж велым икмыняр темлымашым каласен. Мутлан, аварийный илыме верла гыч еҥ-влакым кусарымылан, пассажир-влакым шупшыктымо, йочасадыште верым ситарыме дене кылдалтше йодыш-влаклан поснак кугу тӱткышым ойыраш темлен.   
 
Владимир Путинын Йошкар-Олашке толын кайымыж нерген кумданракын кушкыжмо номерыште палдаренна.
 
Марий Эл Республик Вуйлатышын мер кыл ден увер виктемже
Кусарымаш - Л.Камалетдинова (газет "Марий Эл")