Марий Элын кечыже – Москошто

29 ноябрьыште Москваште ВДНХ-ште «Россий» тӱнямбал ончер-форумышто Марий Эл Республикын кечыже эрта. Тушко мийыше уна-влак регионнан сеҥымашыж дене кылдалтше презентацийым, культурно-образовательный да деловой программе-шамычым ончен кертыт.

Республикым вуйлатыше Юрий Зайцев Марий Элын кечыжым культур проект кумдыкышто 11 шагатлан почеш да регионна нерген презентацийым ышта. 13.30 шагатлан «Шӱмыштем тый улат эрелан…» композитор Андрей Эшпай нерген шарнымаш шотан вашлиймаш лиеш. 14.30 шагатлан артист ден усталык коллектив-влак «Марий мланде – Российын моторжо» пайрем концертым ончыктат. Уна-влаклан тыгак IT-индустрийын «iSpring» лидержын опытшо нерген каласкалат.   

Кечывалым Йошкар-Олан мэрже Евгений Маслов «Рӱдолан шагатшым» эртара. Тыгак Россий кухньын пӧртыштыжӧ марий сийым ончыктат.

РФ Паша да социальный аралымаш министерствын павильоныштыжо «Еш. Паша. Кужу жап» экспозиций 4 ноябрь гычак пашам ышта. Тиде кечын тудын унаже-шамыч республикнан «ший ийготан» чолга еҥже-влак дене палыме лийын кертыт.

Республикыштына кужу жап таза да чолга улмым практике дене ончыктышо примерлан «Вдохновение» куштышо ансамбль (вуйлатышыже – Лидия Васильевна Вязникова) шотлалтеш. Тудым 2016 ий февральыште чумырымо. Тиде жапыште ансамбль 40 утла поро кумыл концертым ончыктен.

Коллективыште – 15 еҥ: 2 пӧръеҥ да 13 ӱдырамаш. Эн кугу участниклан – 76 ий, эн самырыклан – 60 ий. «Вдохновение» куштышо ансамбль регион, россий да тӱнямбал кӱкшытан фестиваль ден конкурслаште участвоватла да шуэн огыл лауреат лӱм дене пӧртылеш. Мутлан, ӱмаште Москваште «Вдохновение» усталык толкынын «GRAND FESTIVAL» тӱнямбал хореографий искусство конкурс-фестивальыштыже сеҥыше лийын.

Коллективын кажне участникше – кугу илыш опытан да шинчымашан, чолга да уста еҥ.

19 шагатлан Марий Элын стендыштыже викторине эрта. Республикнам эн сайын палыше еҥ-влак приз шотеш брендироватлыме сувенирым, рӱдоланан ресторанлашкыже сертификатым, санаторийлашке путёвкым, каныш кечылан турым модын налын кертыт.

Тиде кечынак 48-ше павильонышто кочкыш ярмиҥга лиеш. Тушто марий мӱйым, вареньым, леденецым, вуйдеҥге чайым, мармеладым, сырым да моло продуктым темлат.

М.ИВАНОВА