Марий Элым вуйлатыше – Юрино районышто

Марий Элым вуйлатыше – Юрино районышто
20.07.2021

Корнат ышталтеш, пöртат чоҥалтеш

Марьино-Юрино автомобиль корным  тений олмыкташ тўҥалыныт, тиде пашам кум ий жапыште мучашке шукташ палемдыме улмаш, но Марий Элым вуйлатышын кўштымыж почеш тиде жапым чотак кўчыкемдыме.

Республикын  транспорт да корно озанлык министрже  Александр Герасименкон ойлымыж почеш, палемдыме 25  километр гыч 16 уштышыжым олмыктен шуктымо. Тыгеракын, Марьино-Юрино корно шушаш ийыште ямде лиеш. Кызыт пашазе-влак корнын кок велжым, тыгыде кўм оптен, пеҥгыдемдат, корно-знак-влакым вераҥдат.

«Тиде участкым 2022 ийыште ыштен шукташ палемдыме ыле, но ме тенияк ыштен шуктена. Тендан шындыме задаче шукталтеш.  Моло участке шотыштат конкурсный процедурым эртарыме. Вес семын каласаш гын, ме тений федеральный автомобиль корно марте миен шуына, а шушаш ийыште 2023-2024 ийлан палемдыме  программым  тўрыснек шуктена»,-  каласен Александр Герасименко.

Тыге чулымын пашам ыштымым калык сайлан шотлен вашлиеш, сандене республикысе чыла муниципальный образованийыште корным олмыктымо пашам графикым ончылтен да сай качестве дене шуктыман, палемден Марий Элым вуйлатыше.

Юрино посёлкышто тыгак Кочетов уремыште корным олмыктен шуктымо. 2021 ийыште  ола шотан илемын бюджетшылан верысе кўлешлыкан тўшкан пайдаланыме  автомобиль корным  олмыкташ 9 миллион утла теҥгем ойырымо.  Ты окса дене 8,5 километр кужытан  пўтынь рўдö  уремыште асфальтобетон шартышым олмыктымо.

Тылеч посна тений Р-177 «Приветлужье»  Нижний Новгород – Йошкар-Ола» федеральный значениян  автокорнын Копорулиха ял деч Озерки ял марте шуйналтше 47,7 километр кужытан ужашыжым   да Юрино районысо моло  корным олмыктымо паша мучашке шукталтеш.

Ты районыш паша дене миен коштмо жапыште  Марий Элым вуйлатыше «МРСК Центра и Приволжья»  ПАО–н генеральный директоржын алмаштышыже - «Мариэнерго» филиалын директоржо Сергей Хлусов дене  вашлийын мутланен.  Тудо Александр Евстифеевлан  видеоэскерымаш  системым ончыктан. Системе 36 илемлан питанийым пуэн шога. Марий Элым вуйлатыше аврий лийме годым энергийым пуэн шогаш кўлшö  ешартыш генераторда уло мо нанын йодын. Сергей Хлусов 86 мобильный генераторна уло, тидыже илем-влаклан энергийым кўрылтыш деч посна колтен  шогаш  йöным пуа манын вашештен.

«МРСК Центра и Приволжья»  ПАО – кугу компаний. Ме тудын вуйлатышыже-влак денат, пашаеҥже-влак денат  пеҥгыде кылым кучена. Тыланда сайым гына тыланена. Пашам ыштымыланда тау»,- каласен Александр Евстифеев.

Тудо ты кечын  Юрино посёлкышто  Карл Маркс уремыште кужу жап чоҥалтше илыме пöртым  ончен савырнен. Тудым чоҥымо пашам  2001 ийыштак чарен шогалтыме. Кодшо ийыште объектым у подрядчик оксала налын, но чоҥен шукташ огеш вашке. Сандене тудым у подрядчиклан пуымо шотышто переговор эртаралтеш. Марий Элым вуйлатыше тиде объектым личный контрольыш налаш да лийме семын писынрак чоҥен шукташ кўштен.


Юл гоч паром кошташ тўҥалеш

Юрино кундемыш паша дене миен коштмыж годым Александр Евстифеев Юл эҥер гоч Юрино гыч Сумко поселко марте паром переправым ыштыме йодышым каҥашен да районым  социально-экономически вияҥдыме йодышла дене  совещанийым эртарен.

Республикын транспорт да корно озанлык министрже  Александр Герасименко  Марий Элым вуйлатышылан паром переправым ыштыме паша графикым ончылтен шукталтеш манын увертарен. Паромын сер дек миен шогалме верым келыштарен шуктымо, кызыт кундемым тўзатыме паша мучашке лишемеш. Сумки посёлкышто серым пеҥгыдемдыме да причал гыч серыш волымо корно  ышталтеш. Тергыме шот дене рейсымат ыштен ончымо.

СМИ-н еҥже-влаклан  интервьюм пуымыж годым  Марий Элым вуйлатыше паром переправе республиклан социальный кўлешлыкан  проектлан шотлалтеш  манын палемден.

«Юрино  посёлкышто илыше еҥ-влак  шуко йодыш дене кўлешлыкыштым шукташ  Козьмодемьянскыш миен коштыт.  Эн ончычак медицине полыш шотышто тушко кошташышт логалеш. Сандене паром переправе районлан пеш кўлешан»,- каласен Александр Евстифеев.


Шереметев замокышто - совещаний

Марий Элым вуйлатыше тиде замокышто совещанийым эртарен, тушто районым ончен коштмыжым иктешлен.

«Таче ме  Юрино районым социально-экономически вияҥдыме шотышто черетан совещанийым эртарена. Мый тыланда  талук тўҥалтыште  каҥашыме паша радамым ушештарем. Тунам корным олмыктымо, кумло ий ик  илыме пöртым чоҥымо, паромлан причалым ыштыме да районын рўдыштыжö стадионым почмо йодышым ончышна»,- каласен совещанийыш погынышоо-влаклан.

Республикын транспорт да корно озанлык министрже мутым налмекше тыге увертарен: регионым вуйлатышын кўштымыж почеш  Марьино-Юрино автомобиль корным олмыктымо паша графикым ончылтен шукталтеш. Чылаже 68 миллион теҥгеаш пашам шуктымо.  Юрино посёлкыштат корным олмыктымо паша палемдыме жап деч ончыч шукталтын.

Регионым вуйлатыше сайын пашам ыштымылан министрлан таум каласен да тыге ушештарен: Марий Эл Республик договорной пашам шуктымо жап да качестве шотышто Россий Федерацийыште 13 верыште улеш.

«Тиде мыланна пеш почётан вер. Пашам ыштыме пайдалыкат кугу. Мемнан дене 2022 ийлан контрактым тўрыснек ыштен шуктымо. Мый тыланда тидым ушештарем: Юрино посёлкышто корным  ыштыме йодыш 2017 ийыштак лектын. Тунам мыйым Марий Эл Республикым вуйлатышылан шогалтеныт веле ыле.    Корнын качествыже моткоч  начар лийын – 98 процент корно нормативный требований дене келшен толын огыл. Ме 2022 ден 2023 ийлаштат тыгак пайдалын пашам ышташ тўҥалына да корнын качествыже, тудын нормативный  состоянийыште  улмо кугытшо шот дене Российыште ончыл радамыште лийына манын ўшанем.  Мемнан дене подрядчик-влакат  сайын пашам ыштат»,- палемден Александр Евстифеев.  

У стадион

Марий Элым вуйлатыше  Юрино посёлкышто илыше-влакым  у спортивный объектым почмо  дене саламлен да куштылго атлетике дене икымше  таҥасымашлан  стартым пуэн.

Кызытсе жаплан келшыше  спортивный объект «Спорт – илыш нормо» региональный проект дене келшышын ышталтын. Тудым ышташ  1 миллион теҥгем кучылтмо.

Стадионышто шаршудан футбол пасу, волейболла  да баскетболла модмо площадке-влак, куржталме корно, кужытыш да кўкшытыш тöрштылмö  площадке, ончышо-влаклан 164 веран  трибун, автомашинам шогалтыме вер улыт. Спортплощадкылаште  «Эластур» синтетический шартышым пыштыме. Стадионым кўртньö меҥгылаш вераҥдыме светодиодный  лампе-влак волгалтарат.

Республикын молодежный политике, спорт да туризм  министрже  Лидия Батюкова  стадионышто  баскетбол, волейбол, футбол, куштылго атлетике дене занятий,  тыгак  тўрлö мероприятий-влак эрташ тўҥалыт манын каласен.

Стадионым торжественно почмо деч вара Марий Элым вуйлатыше  спортивный плащадке-влакым ончен савырнен. Пытартышлан тудо спортсмен-влаклан  сеҥымашке шуаш тыланен да сетке ден мече-влакым пöлеклен.     

Марий Эл Республикым  вуйлатышын организаций да аналитике виктемжын  уверже негызеш П.Шакиров ямдылен