Марий Эл вуйлатыше Александр Евстифеев Волжский районыш паша дене миен коштын

Марий Эл вуйлатыше Александр Евстифеев Волжский районыш паша дене миен коштын
13.07.2021

Тӱҥалтыште регион вуйлатыше Яльчик ер деке кайыме корным кузе олмыктымо дене палыме лийын, вет тудо республикыште илыше-влакын йӧратыме каныме верышт деке шуйналтын. Тидын шотыштак МарГУ-н «Олимпиец» да ПГТУ-н «Политехник» спорт базышт тушто верланеныт. Икымшыжын ректоржо Михаил Швецов куржталме да ече роллер дене коштмо годым ты корно дене пайдаланыме нерген ойлен да олмыктымылан тауштен.

Республикын транспорт да корно озанлык министрже Александр Герасименкон ойлымыж почеш, трасса деч ер марте 6 километр утла кужытан корным «Сай качестван лӱдыкшыдымӧ корно» нацпроект дене келшышын олмыктымо. Пашам кӱчык жапыште шуктымо, тидыже спортсмен-влаклан тренировкым ончычрак тӱҥалаш йӧным пуэн.

Волжский район администраций вуйлатыше Татьяна Ильинат корным сайын тӧрлымылан Марий Эл вуйлатышылан да республикын правительствыжлан таум ыштен, вет тудо 50 ий утла капитально олмыкталтын огыл.

Марий Эл вуйлатыше верысе кучемлан тидын дене серлагаш огыл, районым умбакыже вияҥдаш кӱлмӧ нерген ойлен. Ты кундем деч Татарстан тора огыл, тушечын шуко уна толеда. Сандене корно шӱктарышаш огыл, моло йӧнат лийшаш. Тыште тӱшкан каныме верлам шотыш кондыман. Ты шотышто районлан 54 миллион теҥгем ойырымо – тӱҥалтыш ошкыл гына. Но тиде кӱлешан паша – район туризм кластер семын вияҥшаш, палемден регион вуйлатыше.

Александр Евстифеев тыгак Памар селаште у артезиан кӱнчемым ыштымаште лийын. Марий Эл вуйлатыше районлаште калыклан йӱмӧ вӱдым ситарышашлан правительствын резерв фондшо гыч 34 миллион теҥгем ойырымо нерген пунчалам луктын ыле. Тушечын 12 миллион теҥгеже Волжский районысо ныл илемыште у артезиан кӱнчемым ышташ колталтеш. 30 июньышто Памарыште ты пашалан пижме.

Республикын чоҥымо паша, архитектур да илыме вер ден коммунал озанлык министрже Михаил Степановын ойлымыж почеш, кужу жап кукшо игече шогымылан кӧра районласе икмыняр илемыште вӱд ситыдыме шижалтын, тидыже тудым шуко кучылтмо, сад-пакча йырыҥлашке оптымо дене кылдалтын. Но тидлан калыкым вурсаш ок лий, вӱдым ситарыше озанлыклам йыжыҥ дене пужен ыштыме графикым ямдылыман да вӱд шапаш нерген шоналтыман, палемден Марий Эл вуйлатыше.

Район администраций вуйлатыше Татьяна Ильина Юлсер кундемлан кугу тӱткышым ойырымыжлан Марий Эл вуйлатышылан тауштен, вет Приволжский посёлкыштат сайын эрыктыман вӱд тулымо вер чоҥалтеш. «Ме тендан районышто веле огыл тыгай пашам шуктена. Но Волжск кундемыште нелылыкше шукырак погынен, сандене ик жапыштак ныл вере кӱнчем ышталтеш», – каласен Александр Евстифеев. Да республикыштына илыше-влаклан яндар вӱдым кӱрылтыш деч посна ситарен шогымо шотышто программым ямдылаш тӱҥалаш темлен. 

Марий Эл вуйлатышын организаций да аналитике виктемжын уверже негызеш Ю.Исаков ямдылен