Марий Эл – кумшо верыште

2023 ий мучаш марте Марий Элыште 1000 утла еҥ тоштемше пӧртла гыч вес вере илаш кусна

 

Республик вуйлатыше Юрий Зайцев Россий Федерацийыште региональный вияҥмаш шотышто правительственный комиссийын президиумжын заседанийышкыже ушнен. Тудым Россий правительстве председательын алмаштышыже Марат Хуснуллин видеоконференций йӧн дене эртарен.

Совещанийыште субъектлаште национальный да федеральный проект-влакым илышыш пуртымо дене кылдалтше йодышым каҥашеныт.

Марий Эл вуйлатыше ойлен: республикыште 12 нацпроектыш пурталтше 47 региональный проект илышыш шыҥдаралтеш. «Лӱдыкшыдымӧ сай качестван корно» нацпроект почеш 2024 ийыште пашам шукташ палемдыме объектла гыч 70 % шотышто контракт ышталтын.

– Контрактым жапыштыже ыштымаш да авансым тӱлымаш мемнан подрядный организаций-влаклан кӱлеш материалым ямдылаш, сай техникым ойырен налаш да чоҥымо качествылан тӱткышым ойыраш, ачалыме пашам палемдыме жапыште шукташ полша, – каласен Юрий Зайцев.

2023 ийыште нацпроект-влак дене келшышын, 38 объектыште капитально олмыктымо паша ышталтеш. Нунын кокла гыч 23 объектшым тений шуктышаш улыт.

Республик вуйлатышын палемдымыж почеш, тений идалык мучаш марте аварийныйлан шотлалтше илыме верла гыч 1117 еҥым шуко пачеран 13 пӧртыш кусарышаш улыт.

«Стимул» программе почеш Йошкар-Олаште ливневый канализаций системым 75 %-лан уэмден тӧрлатыме, Медведево район Тойкан ялыште у пӧртлам чоҥымо кумдык деке 89 %, Апшакплак ялышке 52 % автомобиль корным ыштыме.

«Аналитика» АРМ федеральный аналитический системын данныйже почеш, нацпрпоект-влакым илышыш пуртымо шотышто Россий регион-влак коклаште Марий Эл – 24-ше верыште. Тидлан оксам кучылтмо шотышто – 3-шо верыште.

Марий Эл вуйлатышын администрацийжын информаций паша пӧлкажын уверже негызеш Л.Камалетдинова ямдылен