Марий Эл деч – у ий пӧлек

Марий Элым вуйлатышын кӱштымашыже почеш, мемнан республик деч Луганск область гыч 1200 йоча у ий пӧлекым налын.

Тыгай пӧлекым ыштыме шотышто задачым регионым вуйлатыше Юрий Зайцев ӱмаште декабрьыште шынден. Тудын кӱштымыж почеш, тиде пашам республикын Социальный вияҥмаш министерствыже ыштен.

Тыге кундемна деч пӧлекым Новоайдарский санаторный, Перевальский специальны (коррекционный) школ-интернатлаште илыше тулык йоча-влак налыныт.

«У ий – юзо пайрем, йоча-влак пӧлек деч посна кодшаш огытыл. Пытартыш ийлаште Донбассын йочаже-влаклан неле лийын. Полышым пуаш – мемнан гражданский порысна. Луганск Калык Республикыште илыше икшыве-шамычлан пӧлекым ямдылаш да жапыштыже нунылан кучыкташ полшышо-влак тау», – каласен Юрий Зайцев.


Марий Эл вуйлатышын администрацийжын информаций паша пӧлкажын уверже негызеш Г.Кожевникова ямдылен