Республикысе ялозанлык предприятий-влак ӱмашсе дене таҥасатарымаште, тений пырчым 1,6 пачаш шукырак поген налаш палемдат
Тидын нерген регионын ялозанлык да продовольствий министржын пашажым жаплан шуктышо Андрей Кондратенко правительствын заседанийыштыже каласен. Тудым Марий Эл вуйлатыше Юрий Зайцев вӱден.
Палдарымыж почеш, тений 152 тӱжем гектар гыч пырчан да пырчан-отызан культурым поген налман. Тидыже 2021 ийысе деч 5000 гектарлан шукырак. Пареҥгым – 2,8 тӱжем гектар гыч, пакчасаскам – 1,7 тӱжем гектар гыч. Икымшыже ӱмашсе деч 350 гектарлан, кокымшыжо 170 гектарлан утларак.
Кызытсе жаплан озанлыклаште 139 тӱжем гектарыште, тидыже 93 % лиеш, пырчан да пырчан-отызан культурым шийме. Кодшо ийын ик гектар гыч 26 центнерым налме гын, тений – 28.
– Тиде моткоч сай показатель. Пытартыш лу ий жапыште тыгайже лийынат огыл, – ойлен Андрей Кондратенко.
Марий Эл вуйлатыше ялозанлыкыште тыршыше-влакын пашаштым палемден да тыгай сай лектышыш шумо мо дене кылдалтме нерген йодын. Министрын пашажым жаплан шуктышын каласымыж почеш, эн ончычак тиде ӱяҥдышым палемдыме дене келшышын шавыме дене кылдалтын. Тылеч посна озанлык-влак «органикым» да кугу лектышым пуышо пырчым утларак кучылташ тӱҥалыныт.
– Индивидуальный программе почеш ме жаплан келшыше шуко техникым налынна. Тидыже ынде мыланна шурным йомдарымаш деч посна поген налаш йӧным ышта. Тыгай лектышыш шуаш ӱдымӧ кумдыкым кугемдымат полшен. Тений ме 7000 гектарым ешаренна, – рашемден Адрей Кондратенко.
Республикын правительствыжын заседанийыштыже ойленыт: тений 340 тӱжем деч шагал огыл тонн пырчым, 250 тӱжем тонн пареҥгым, 120 тӱжем тонн пакчасаскам поген налаш палемдат.
Але марте 128 тӱжем тонн кургым ямдылыме. Кокияш культурым 45000 гектарыште ӱдымӧ. Тидыже 95 % лиеш. Лишыл жапыште 7,5 тӱжем гектар гыч кукурузым поген налман.
Машина-трактор паркым уэмдышашлан озанлык-влак 393 единице техникым да оборудованийым налыныт. Нунын акышт 1,5 млрд. теҥгешке шуын. Ӱмашсе жап дене таҥастараш гын, тиде 123 % лиеш.
Ялозанлык производствылан кугыжаныш 528 млн. теҥге полышым пуэн.
Марий Эл вуйлатыше Юрий Зайцев министерствылан муниципал район администраций-влак дене пырля урожайым погымо паша кузе кайыме шотышто тыгак мониторингым эртараш да ялозанлыкым вияҥдыме программым умбакыжат илышыш пурташ полшаш кӱштен.
Марий Эл Республикым вуйлатышын организаций да аналитике виктемжын уверже негызеш Л.Камалетдинова ямдылен
