Латкокыт гыч индешыжым олмыктымо

Марий Элыште 9 кӱварым олмыктен шуктымо нерген Марий Эл вуйлатыше Юрий Зайцевлан республикын транспорт да корно озанлык министрже Александр Герасименко ойлен. 2023 ийыште чылаже 12 кӱварым олмыктат, чумыр кутышыжо 600 погонный метрыш шуэш. Чыла объект жапыште сдатлыме лиеш, ӱшандарен министр. Марий Эл вуйлатыше каласен: палемдыме мероприятий-влакым шыже кыдалне ыштен шуктыман. «Паша график почеш да эсогыл ончылтенат кая. Южо объектын кутышыжо кужу огыл, районласе кӱвар-влак ял ден ялым ушат да калыклан кӱлешан улыт. Икмыняр вереже мый шкеат лийынам, асфальт шартыш могай улмым ужынам. Мемнан президентна Владимир Владимирович Путинын кӱштымыж почеш шукталтше «Сай качестван лӱдыкшыдымӧ корно» нацпроект дене келшышын, ме республикысе корным да кӱвар-влакым нормативыш кондена. Но паша эше шуко уло. Срокым веле огыл, пашан качествыжымат контрольышто кучаш йодам», – каласен Юрий Зайцев.

Марий Эл Республикым вуйлатышын администрацийжын информаций паша пӧлкажын уверже негызеш Л. СЕМЕНОВА ямдылен