Марий Эл вуйлатыше Юрий Зайцев 23 мартыште чрезвычайный ситуацийым шижтарыме да пытарыме ден пожар лӱдыкшыдымылыкым ыштыме шотышто правительственный комиссийын заседанийжым эртарен.
Регион вуйлатыше тӱҥ задачым палемден – тиде чрезвычайный ситуацийлаште, тыгак вӱдшор да пожар годым еҥ-влакым колымаш деч утарымаш.
Докладым республикын пӱртӱс поянлык, экологий да йырым-йырысе средам аралыме министр Алексей Киселев ыштен. Ойлымыж почеш, пожар лӱдыкшӧ пагытыште пашашке 2864 еҥым, 511 техникым ушаш, тул ваштареш кучедалаш 2323 оборудований ден инвентарьым кучылташ палемдалтеш. Тылеч посна чодыра участке арендатор-шамыч дене пожарым пырля йӧртымӧ шотышто 95 ойпидышым ыштыме. Тыге нунын велым 621 еҥ деч полыш лийшаш, 216 технике ойыралтшаш.
Алексей Киселевын палдарымыж почеш, чодырам пожар деч аралыме пашалан 2023 ийыште министерствылан 51 миллион наре теҥгем ойырымо. Тышеч 35 миллион теҥге утлажым – федеральный бюджет гыч, 15 миллион теҥге утлам – республикын гыч.
Россий МЧС-ын Марий Элысе Тӱҥ управленийжын начальникшын ойлымыж почеш, ӱмаште регионышто 996 пожарым регистрироватлыме. Тушто 39 еҥ ӱмыр лугыч лийын. 2021 ий дене таҥастарымаште, тиде чот 32 %-лан, колышо-влакын чотышт 37 %-лан иземын. Пожар тӱҥ шотышто тул, электроприбор дене пайдаланыме годым лӱдыкшыдымылык правилым шотыш налдымылан, коҥган да тӱньыкын шаланыше улмыштлан кӧра лийын манын палемден.
Шошо вӱдшорым аварий деч посна эртарыме шотышто Организационно-технический мероприятий-влак планын кузе шукталтмыж нерген республикын гражданский обороно да калыкым аралыме комитет председатель Александр Малкин каласкален. Ойлымыж почеш, мом палемдыме гыч чыла гаяк тӱрыс шукталтын.
Марий Эл вуйлатышын администрацийжын информаций паша пӧлкажын уверже негызеш Л.Камалетдинова ямдылен
