Кыл пеҥгыдемеш

Йошкар-Олаш Индий Республикын полномочный министрже, ты элын Россий Федерацийысе посольствыжын советникше Субрата Дас толын коштын. Тудын дене 24 ноябрьыште Марий Элым Вуйлатыше Юрий Зайцев вашлийын.

Регионым вуйлатыше Субрата Дасым саламлен ойлен да Россий ден Индий шукертсек поро йолташ семын кылым кучат да шуко тӱрлӧ сферыште партнёр семын пашам ыштат манын палемден.

Субрата Дас шокшын вашлиймылан Марий Элым вуйлатышылан таум каласен да образованийыште веле огыл, моло сферыштат пырля пашам ыштыме кылым умбакыже пеҥгыдемдаш ямде улмым ончыктен.

Пашаче вашлиймашын участникше-влак Марий кугыжаныш университетыште туныктымо пашам виктарен колтымо йодышым каҥашеныт. МарГУ-н ректоржо Михаил Швецов индий студент-влак дене занятий англичан йылме дене эртаралтеш, тыгодымак нуно руш йылмымат тунемыт манын увертарен. Индий гыч толшо самырык еҥ-влаклан тунемашышт да илашышт йӧнан условийым ыштыме, нуно вузын мер илышыштыже, тӱрлӧ спортивный ден культур мероприятийлаште чулымын участвоватлат.

Кызыт МарГУ-што 1300 индий студент тунемеш, тышеч шукынжо медицине факультетыште шинчымашым погат. Университет Медицине школ-влакын тӱнямбал справочникышкышт да Индийын Медицине Советшын признатлыме вуз-влакын спискышкышт пура.


Марий Эл Республикым вуйлатышын организаций да аналитике виктемжын уверже негызеш П.Шакиров ямдылен