Кундемна – кумылым налеш да кумылым нӧлта

4 ноябрь – уло элна дене палемдыме Калыкнан икоян улмо кечыже гына огыл, Марий Эл Республикын шкенжын 103 ияш лӱмгечыже.

Тиде пагытыште ме кажне кечын кундемнам чыла шӧрын гычат вияҥден толаш тыршена. 50 утла тӱрлӧ калык тыште ик еш семын ила, пашам ышта. Келшымаш, икте-весым пагалымаш, ваш полшен шогымылан кӧрак кажне кечын ончыко каена, экономикыште, ялозанлыкыште, социальный илышыште, тӱвыраште, сымыктышыште сай лектышыш шуына да Российын кумдыкыштыжо илыше марий-влакым веле огыл ӧрыктарена. Ялозанлык, промышленный сатум гына 86 элыш да Российын 70 регионышкыжо колтена. Эсогыл Европыштат ик эн кугулан шотлалтше каза фермына уло, тушто ыштыме сыр эл кӱкшытысӧ ончерлаштат эре палемдалтеш.

Регионым вуйлатыше-шамычат чыла ты пашам моштен виктарат да Россий кугыжаныш кӱкшыт гыч полыш лийже манын тыршат. Мом шога шукерте огыл Федераций Советыште эртыше Марий Элын кечылаже! Могай гына сай уверым ышна нал! Республикна, вий-куатшым ешарен толын, чылажымат шкалан шке ситараш тырша. Тӱҥ отрасльыште 77 инвестиционный проектым илышыш шыҥдараш, здравохраненийын, культурын, туризмын кӱлешан 30 объектшым ышташ, кок районышто газым пурташ палемдыме. Тачысе кечылан чылаже 111 инвестиционный проект чылаже илышыш шыҥдаралтеш, палемден Марий Эл вуйлатыше Юрий Зайцев. Кызытсе умылыдымаш пуламыр жапыште республикна эллан аралалтме йӧн-влакымат ыштен шога.

Кундемыште IT-сферым вияҥдымылан кугу вер ойыралтеш. Йошкар-Ола аэропорт олмыкталтеш, ынде Москош, Санкт-Петербургыш, кечывалвелыш чоҥештылаш йӧн лиеш. Ты пашажым 2027 ийыште гына мучашлышаш улыт ыле, но кугыжаныш кучем полшаш сӧрен, вес ийынак тидым ыштен шуктышаш улыт. Киров велке наҥгайыше кӱртньыгорнымат Яранск гыч Котельнич марте ыштен шукташ полшышаш улыт. Козьмодемьянскыште ыштыме причал семынак, тыгай кок объект Юрино ден Кокшайскыште лийын шушаш.

Икманаш, кундемна эшеат тӱзланышаш, вес семынже лийынжат ок керт, вет Марий Эл – экологий шотышто Российын ик эн яндар регионжо. Шкенан чодыра, ший вӱдан эҥер ден ер-влак куандарат. А мыняр сылне верже! Марий рӱдолажак могай сӧрал лийын. Мемнан деке толшо турист тӱшка койын ешаралтеш. Россий мучко шаланен пытыше марий-шамычат олашкына марий улмыштым шижаш, у шӱлышым налаш лӱмын толын каят. Вашке Йошкар-Олаштына эсогыл лӱмын Марий парк лийын шушаш. Марий шӱлыш рӱдолаштына тӱжвал сыныштыжат койын ешаралт толеш. А калыкнан шочмо йылмыжым, тӱвыражым, йӱлажым вияҥдымылан регионысо кучемнат, тӱвыра, образований пашаеҥ, мер ончылъеҥ-шамычат чот тыршат.


С.Носова