Кугыжаныш награде – медик-влаклан

Кугыжаныш награде – медик-влаклан
19.06.2014
Июньысо кумшо рушарнян Медицине пашаеҥ-влакын кечышт палемдалтеш. Поро йӱла почеш ты пайрем вашеш Марий Элым вуйлатыше Леонид Маркелов калыкын тазалыкшым арален кодышаш верч лым лийде тыршен шогышо пашаен-влак дене вашлийын. Тудо нуным профессиональный пайремышт дене саламлен да поснак ойыртемалтше медицине пашаеҥ-влаклан Российын да Марий Элын кугыжаныш наградыштым кучыктен.
 
2-шо №-ан республиканский психиатрический больницын тӱҥ врачше Светлана Абовян «За заслуги перед Отечеством» орденын II степенян медальже дене  палемдалтын. Сар-влакын  ветераныштын  республиканский клинический госпитальыштын медицине вашкеполыш пӧлкажын кугурак врачше Виктор Салеевлан «Россий Федерацийын сулло врачше» почетан лӱмым пуымо.
 
Тиде кечын чапландырыме еҥ-влак коклаште врач ден медсестра-влак веле огыл, моло пашаеҥат лийыныт. Нунынат тыршен ыштыме пашаштым ужын шуктеныт. Теве Республиканский клинический больницын экстренный да консультативный медицине полышым пуымо да медицинский эвакуаций пӧлкажын медицине вашкеполыш машинажын водительже Валерий Крупновлан «Марий эл Республикысе транспортын сулло пашаеҥже» почетан лӱмым пуымо. Эше куд еҥ «Марий Эл Республикын сулло врачше», кок еҥ ««Марий Эл Республикысе здравоохраненийын сулло пашаеҥже» почетан лӱм дене палемдалтыныт. Тазалыкым аралыме системыште тыршыше ныл еҥлан Марий Эл правительствын Почетан грамотыжым кучыктымо, куд пашаеҥлан республикым вуйлатышын тауштымашыжым увертарыме.
 
Медицине пашаеҥ-влакым саламлен ойлымекше, Леонид Маркелов тазалыкым аралыме системым вияҥден толмо нерген каласкален, ончыкылык план дене палдарен. Тудо тыге палемден: пытартыш ийлаште тазалыкым аралымашке пеш шуко оксам колтымо. Теве федеральный бюджет гыч гына миллиард утла теҥге пурен. Республикын правительствыже тиде пеш кӱлешан отрасльым вияҥдышаш верч ончыкыжат чот тыршаш тӱҥалеш, палемден вуйлатыше.
 
Погынышо медицине пашаеҥ-влак лӱм дене Марий Элын сулло врачше Надежда Фролова ойлен. Тудо медициным вияҥдышаш верч тыршен шогымылан правительствын председательже Леонид Маркеловлан таум каласен.
 
Пытартышлан награде дене палемдалтше медик-влак Марий Элым вуйлатыше дене пырля войзалтыныт. 
 
перевод - газета "Марий Эл"