«Куан шижмашда кужу жаплан аралалт кодшо»

«Куан шижмашда кужу жаплан аралалт кодшо»
08.09.2014
Кодшо кечылаште бюджет сферыште пашам ыштыше куд еш Воскресенский проспектысе пӧртыштӧ верланыше у пачер деч сравочым налын. Пӧртсий пайрем дене нуным Марий Элым вуйлатыше Л.Маркелов саламлен.
 
- У илыме верым налше-влакым уло кумылын саламлем, вет у пачерыш куснымо – тиде кажне еҥын илышыштыже путырак кӱлешан событий.
 
Таче кызытеш куд еш у пачеран лийын, но республикын правительствыже тыште бюджет сферыште тыршыше-влаклан сӧрал пӧрт-влакан тичмаш уремым чоҥымо кугу пашам шукта. Еҥ-влаклан илашышт сай йӧным ыштыме деч кӱлешанрак пашаже кучемын уке. У илыме верыш куснымылан кӧра авалтыше куан шижмашда кужу жаплан чоныштыда аралалт кодшо, - манын Л.Маркелов.
 
У суртоза-влаклан пачер деч сравочым Марий Элым вуйлатыше шкежак кучыктен. Тудо икмыняр пачерыште лийын да чеверласымыж деч ончыч пиалан еҥ-влаклан ешыштышт эре ваш умылымаш ден ласкалык лийже манын тыланен.
 
- Бюджетник-влаклан тыгай пӧрт-шамычым Йошкар-Олаште веле огыл, райрӱдылаштат чоҥаш тӱҥалына. Муниципальный образованийлаште лийме годым мыланем тушто илыше-влак  районышто специалист-шамычын ситыдымышт нерген ойленыт. Нуным верыштак кодаш кузе-гынат кумылаҥдаш кӱлеш. Тидым пачерым пуымо дене ышташ лиеш, шонем. Сандене кажне районышто бюджетник-влаклан пӧртым чоҥаш палемденна, - шонымаш дене палдарыш Марий Элым вуйлатыше Л.Маркелов.
 
Тиде пӧртым пеш писын чоҥен шуктымо.12 майыште республик вуйлатыше тудын негызышкыже шарнымаш кӱм пыштымаште лийын. Тунам Л.Маркелов туныктышо ден врач, медсестра ден тренер да культур пашаеҥ-влаклан пачерым яра пуаш тӱҥалме нерген ойлен ыле. Республик кучемын ты шотышто сай опытшо уло. 
 
Марий Эл Республик Вуйлатышын мер кыл ден увер виктемже
Кусарымаш - Е.Николаев (газет "Марий Эл")