26 августышто Марий Эл вуйлатыше Юрий Зайцев Козьмодемьянск олалан 440 ий теммылан пӧлеклалтше пайремыште лийын.
Тудо тиде олаште илыше ден уна-влакым юбилей дене саламлен да Козьмодемьянскын мэрже Михаил Козловлан комбинироватлыме корно машинам да олалан тул технике оборудованийым налаш 10 миллион теҥгеаш сертификатым кучыктен.
– Козьмодемьянск – тиде Юлышто мемнан чинчына (жемчужина). Тудо шке историйже да тӱвыраж дене чаплана. Олаште ожнысо изи урем-влакат, кызытсе жаплан келшыше шуко пачашан пӧрт-влакат улыт. Козьмодемьянск эшеат мотор лийже манын, ме полшаш тыршена. Тений причальный стенке пашам ышташ тӱҥалшаш. Тунам ныл палубан корабль-влак тушко толын шогалын кертыт. Тидыже туризмым да олам вияҥдаш полша, – каласен Юрий Зайцев. Вара мутшым умбакыже шуен: – Козьмодемьянскыште илыше пагалыме еҥ-влак, те шочмо оладам йӧратеда, тудын историйжым, йӱлажым пагаледа да ончыкылык тукымлан уэмден арален кодаш тыршеда. Тау тыланда. Козьмодемьянсклан вияҥаш да тӱзланаш, а тыланда пиалым да сай кумылым тыланем.
Олан мэрже полышым пуымылан Юрий Зайцевлан тауштен да Козьмодемьянсклан 440 ий темме лӱмеш лукмо книгам пӧлеклен.
Тиде пайремыштак регион вуйлатыше «Ведомости Козьмы и Дамиана» газетын тӱҥ редакторжын алмаштышыже Олег Морозюклан да Козьмодемьянскысе культурно-исторический тоштер комплексын художественный вуйлатышыже Ирина Якимычевалан Марий Эл правительствын Чап грамотшым кучыктен.
Олан кечыжым моткоч кумдан палемденыт. Программе дене келшышын, предприятий ден организаций-влакын парадышт, колым кучымаш дене таҥасымаш, концерт, ончер, фестиваль-влак лийыныт, икшыве-шамычым тӱрлӧ модыш дене куандареныт, «Паллада» парус клуб показательный выступленийым ончыктен. Пайрем «Демо» группын концертше да дискотеке дене мучашлалтын.
Марий Эл вуйлатышын администрацийжын информаций паша пӧлкажын уверже негызеш Л.Камалетдинова ямдылен
