Козьмодемьянск умбакыже кушкеш да тўзлана

Козьмодемьянск умбакыже кушкеш да тўзлана
20.07.2021

19 июльышто   Марий Элым вуйлатыше Александр Евстифеев  Козьмодемьянскыш паша дене миен коштын. Тушко миен кошташ шонымаш кундемым вуйлатышын олаште стадионым ыштен шуктымо да кужу жап чоҥалтше илыме пöртын азапыш логалше собственникше-влакын праваштым шукташ йöным ыштыме йодышла дене ондак эртарыме совещанийын итогшо почеш шочын.

Марий Элым вуйлатыше эн ончычак  Козьмодемьянск олан кумшо микрорайоныштыжо верланыше чоҥен шуктыдымо  60 пачеран вич пачашан пöртым ончен савырнен. Ты объектыште чоҥымашке оксам пай шот дене пыштыше еҥ-влак тачысе кечылан кодын огытыл. Курыкмарий межрайонный  прокуратурын информацийже почеш, пöртым чоҥымашке  кум еҥ инвестирований  договор  дене келшышын  оксам пыштен улмаш. Нуно вараже  пöртым чоҥышо предприятий деч оксам пöртылташ йодмашым судыш пуэныт. Тиде пöртыштö пачерым налаш нунын правашт ынде уке.

Республикым вуйлатыше  верыштак производственный совещанийым эртарен. Пöртым ончен савырнышыжла, тудо объектым чоҥен шукташ кўштен.

Александр Евстифеевын корныжо    тылеч вара  «Юбилейный» стадионыш шуйналтын.  Тудым пужен уэмдыме  проект  «Россий Федерацийыште  физический культур ден спортым  вияҥдымаш» федеральный  целевой программыш пура.

Тиде спортивный объектым  тўзатыме паша икмыняр йыжыҥ дене эрта. 2019 ийыште тушто шуко функциян площадкым  ыштыме. Тудыжо  телым каток семын кучылталтеш, а кеҥежым тушто баскетбола модыт.

Кодшо ий 28 апрельыште  стадионым пужен уэмдыме проектын кокымшо черетше шукталташ тўҥалын. Но пашам айда-лийже  ыштымылан кöра футбол пасум да  куржталме  корным мучаш марте ыштен шуктен огытыл.

Молодёжный политике, спорт да туризм министр Лидия Батюкова ден  Козьмодемьянскын мэрже  Михаил Козлов  проектын кокымшо черетше  30 июль марте мучашке шукталтеш манын сöреныт.

Марий Элым вуйлатыше  стадион кундемым тўзатыме да спортсмен-влакын вургемым вашталтен чийыме  верым ыштен шуктымо йодышлан  кугу тўткышым ойыраш темлен.

Козьмодемьянскым ончен коштмо жапыште регионым вуйлатыше тыгак «Козьмодемьянск – историй, экологий да традиционный культур»  проектым шуктен толмо паша дене палыме лийын. Москвасе  Архитектурный школын лабораторийжын  2020 ий  январьыште ямдылыме тиде проектым  РФ Минстроый сайлан шотлен, тудо «Илыме вер да оласе йырвер кумдык»  национальный проектын «Оласе йöнан йырвер кумдыкым ыштымаш»  федеральный проектше кышкарыште эртаралтше  Всероссийский  конкурсышто сеҥышыш лектын да 44,5 миллион  теҥгеаш грант дене палемдалтын.

Паша олан ўлыл ужашыштыже, Юл  эҥер серыште, шукталтеш да  Карл Маркс  площадьым, Лихачёв уремын «Волга» ресторан марте шуйналтше ужашыжым, Ленинлан чапкў йырысе кумдыкым, тидын шотыштак  Рўдö паркым,  авалта.

Кызыт корно пашаеҥ-влак асфальтым шараш ямдылалтыт: тыгыде кўм оптат, корнын кок велыштыже йўр вўдым йоктарен колтымо волак-влакым келыштарат.

Марий Элым вуйлатыше тошто школын  зданийжым ужын шуктен да тудымат тўзаташ темлен.  Тушто унагудо номерлам келыштараш, икымше пачашыште, мутлан, кафем почаш але  моло семын кучылташ лиеш ыле, вет олаште туристический сервисым  вияҥдыде огеш лий,   манын Александр Евстифеев.

Уна-влак 1696-1697 ийлаште  чоҥымо федеральный значениян  историй да культур  памятниклан шотлалтше  Стрелецкий часовньыланат тўткышым ойырыде коден огытыл.

Олан мэрже  Марий Элым вуйлатышылан тошто купеч пöрт-влак кокла гыч иктыштыже  Мужыраҥме полатым  почаш шонымо нерген  каласен.

Пеш сай шонымаш,- каласен  республикым вуйлатыше.  Рекламым ышташ кўлеш.  Йошкар-Ола гыч,  эсогыл Чебокср да Нижний Новгород гыч  самырык-влак возалташ толаш тўҥалын кертыт. Тиде йодышым  ЗАГС пашаеҥ-влак дене кутырен келыштараш шотеш толеш. Ты шонымаш мылам келша, палемден Александр Евстифеев.

Марий Элым вуйлатыше олам ончен савырныме деч вара совещанийым эртарен. Тушто олам да пўтынь Курыкмарий районым вияҥдыме  пашам иктешлыме да ончыкылык задачым рашемдыме. 

Марий Эл Республикым  вуйлатышын организаций да аналитике виктемжын  уверже негызеш П.Шакиров ямдылен