Кокымшо, но пытартыш огыл

Кокымшо, но пытартыш огыл
25.09.2014
Пытартыш кок тылзыште Волжский районысо медицине пашаеҥ-влак кокымшо гана пӧртсийым пайремленыт. Ончыгече Марий Элым вуйлатыше Л.Маркелов Шарача селаште у фельдшер-акушер пӧртым почмаште лийын.
 
Ты оралтым «Марспецмонтаж» ОАО-н пашаеҥже-влак нӧлтеныт. Чоҥымо пашан чумыр акше  – 10 миллион утла теҥге. 2014 ийлан адресный инвестиций программе дене келшышын, окса республиканский бюджет гыч ойыралтын. Икымше кермыч тений апрельыште пышталтын, а сентябрь мучашлан ФАП шке омсажым еҥ-влаклан почынат. Тушто кок врач, фельдшер, медсестра-влак пашам ыштат. Нуно Шарача селасе калыклан веле огыл, тыгак воктен ялласе еҥ-шамычланат медицине полышым пуаш тӱҥалыт.
 
- Волжский районышто кокымшо ФАП-ым почына, тидын дене чылаштым саламлаш лиеш, - манын республикым вуйлатыше. – Шушаш ийыште эше нылытым чоҥаш палемдыме. Тылеч посна Приволжский посёлкышто бассейнан физкультурно-тазаҥдыме комплексым нӧлтен шындаш палемдыме. А эн тӱҥжӧ – район кундемыште «Акашевский» чыве фабрике пеш кугу инвестиций проектым илышыш шыҥдараш тӱҥалеш. Тыште сурткайыкым ашныме икмыняр комплекс лийшаш, комбикормам ыштен лукмо куатым ятырлан  кугемдаш палемдалтеш. Районышто илыше ятыр шӱдӧ еҥлан паша вер лектеш, нуно кугу пашадарым налаш тӱҥалыт.
 
Л.Маркелов у фельдшер-акушер пунктым ончал савырнен, сайын чоҥымыштлан строитель-влаклан тауштен. Ты медучрежденийын шуко еҥым авалтымыжым шотыш налын, республикым вуйлатыше спецтранспортым налын пуаш сӧрен. «Ялысе калык оласе деч  начарынрак илышаш огыл, социальный услугымат сайым гына налшаш. Тышке шушашлан  ме лым лийде тыршена», - палемден пытартышлан Л.Маркелов.
 
Марий Эл Республик Вуйлатышын мер кыл ден увер виктемже
Кусарымаш - Л.Иванова (газет "Марий Эл")