Китай дене кыл пеҥгыдемеш

КНР-ыште Цзянси  провинцийысе Наньчан  олаште Российын Юл кундем  федеральный округышкыжо пурышо  регион-влак ден Китай Калык Республикыште Янцзы эҥерын кокла йогынжо кундемысе провинций-влак дене  пырля пашам ыштыме  шотышто советын заседанийже лийын. Тудо Россий Федераций  президентын ПФО-со  полномочный представительже  Игорь Комаров ден Китай Калык Республик  Госсовет Премьерын алмаштышыже  Чжан Гоцинын председательствоватлымышт почеш эртен.  

Советын пашаштыже Марий Эл деч  республик правительствын  председательжын  алмаштышыже  Дмитрий Троицкий  участвоватлен.

Тушто Китайын провинцилаж дене  торгово-экономический, инвестиционный да гуманитарный  сферылаште кылым кучымо шотышто ончыкылык планым каҥашыме.

Россий Федераций  президентын ПФО-со  полномочный представительже  «Юл-Янцзы» межрегиональный  сотрудничествын  механизмже эл-влакын интересышт, Россий ден Китай кокласе  кыл кучымашын содержанийже  дене иктӧр  келшен толеш манын  палемден. Тудо Китайын провинцийже-влак дене «Юл-Янцзы» форматыште  пырля пашам ыштыме кыл  ончыкыжо эшеат пеҥгыдемеш, ПФО  китай партнёр-влак дене кылым кучаш кумылан манын каласен.

Марий Эл правительстве председательын  алмаштышыже  Дмитрий Троицкийын мутшо почеш, республикын Китай дене икте-весылан пайдале кылым кучымо сферым  кумдаҥдыме шотышто йӧнжӧ ситышын уло. Марий Эл ден КНР коклаште торгово-экономический кыл  ӱшанлын вияҥеш.  Внешнеторговый  оборот  кум ий жапыште  кум пачаш  кугемын да 2022 ийыште 66,4 миллион долларыш шуын, тидыже Марий Элын пӱтынь внешнеторговый  оборотшын 20 утла процентше лиеш. Марий Эл КНР-ын провинцийже-влак дене икте-весылан пайдале кылым пеҥгыдемдаш  ямде,    палемден Дмитрий Троицкий.

Марий Эл Республикым вуйлатышын  администрацийжын  информаций паша  пӧлкажын  уверже негызеш  П.Шакиров ямдылен