Келшен илымаш иктеш уша

Самырык тукымын «Келшымаш – иктеш лиймаште»  национальный тӱвыра-влак 10-шо фестиваль  Самырык-влакын полатыштышт эртен. Тудо Марий Элын кечыжлан пӧлеклалтын.

Республик вуйлатыше уэмдыме оралтым ончен лектын. Полатыште вентилироватлыме фасадым ыштеныт, окнам, омсам вашталтеныт, шуко фунциян кумдык ден книгагудым, лекцийым эртарыме залым олмыктеныт, вучымо кумдык ден видеостудийым ыштеныт. Ончышо-влаклан келыштарыме залат шке тӱсшым вашталтен. Тушто у кресле-шамыч ден  тачысе илышлан келшен толшо стветодиодан экраным вераҥденыт, ешартыш тулым пуртеныт, йӱк ден аудиооборудованийым монтироватленыт.

 Кокымшо ден кумшо пачашлам, тошкалтышлам, спортзалым, администраций блокым  олмыкташ  2024 ийыште республиклан ешартыш оксам ойырат. Капитально ачалыме паша федеральный бюджет гыч субсидий полшымо дене ышталтеш. Тудо молодёжный политикым вияҥдыме «Самырык-влаклан регион» комплексный программе кышкарыште эртаралтеш.

Марий Эл вуйлатыше «Тӱнямбалсе калык-влак» интерактивный выставкым ончен лектын. Ончерыште кундемыштына илыше тӱрлӧ калык гыч улшо самырык-влакын илышышт дене кумданрак палыме лияш йӧн лийын.

Юрий Зайцев каласен: «Марий Эл Республикыште 50 утла тӱрлӧ калык ила, а вузлаште 40 эл гыч студент-шамыч тунемыт. Лач келшен илымаш мемнам, тыгай тӱрлӧ калыкым, иктеш уша. Торашке каена гынат, пеленна ме  кундемын тӱвыражын изи ужашыжым наҥгаена. Республикын правительствыже  ты мероприятий ончыкыжымат вияҥже манын умбакыжат тыршаш тӱҥалеш».

Марий Эл Республикым вуйлатышын администрацийжын информаций паша пӧлкажын уверже негызеш Л.ШАБДАРОВА ямдылен