Кеч-куштат лӱдыкшыдымӧ лийшаш

Юрий Зайцев Марий Элын оперативный штабшын заседанийжым эртарен.

Регион вуйлатыше палемден:

– Оперативный штабын задачыже вашталтын огыл, тиде – пӱртӱс да техногенный сынан чрезвычайный ситуаций-влак лийме деч еҥ-влакым да кумдыкым аралыме шотышто ыштышаш пашам палемдымаш, тыгак Россий Федерацийын вооруженный вийжылан, воинский формирований-влаклан да калыклан мо кӱлешым ситарымаш.

Заседанийыште законодательствын транспорт лӱдыкшыдымылык, гражданский обороно объект-влакым шотышто кучымо, материально-технический, кочкыш, моло средстве шапаш нерген йодмашыжым шуктымо дене кылдалтше йодыш-влакымат каҥашеныт.

Заседанийын участникше-шамыч Марий Эл вуйлатышылан кӱртньыгорно станций, автовокзал-влакым аралыме шотышто могай сӱрет улмо, могай нарушенийым вашлийме, моло нерген ойленыт.

Юрий Зайцев транспорт инфраструктур объектлаште лӱдыкшыдымӧ лийже манын пашам эшеат чот саемдаш, профилактический мероприятий-влакым эреак эртараш кӱлмӧ нерген кӱштен каласен. Вашлиялтше экшык, ситыдымаш, лӱдыкшӧ улмым кораҥдыме нерген республик вуйлатыше лишыл жапыште палдараш йодын.

Марий Эл вуйлатышын администрацийжын
информаций паша пӧлкажын уверже негызеш Л.Камалетдинова ямдылен