Каналтышаш кумыл илышым ок шого...

Каналтышаш кумыл илышым ок шого...
13.07.2021
Россий МЧС-ын Марий Элысе Тӱҥ управленийжын пресс-службыжын увертарымыж почеш, кажне кечын гаяк вӱдыштӧ колышо-влак нерген увер лектеш. Газетнан икымше лаштыкыштыже тидын нерген возымо огеш шу гынат, калыклан эше ик гана шижтарыде огеш лий. Тидым ышташ регион вуйлатыше Александр Евстифееват йодеш. Ок сите – коронавируслан кӧра калыкна шагалемеш, шкенан тӱткыдымылыклан кӧра илышнам кошарташ вашкена. Пытартыш жапысе статистикат тидымак пеҥгыдемда.  

Май гычак тӱҥалына. 18-19 май. У Торъял районысо Немда эҥерыште школышто тунемше 9 ияш йочан илышыжым вӱд налын. Вес кечын Волжскысо Конопляное ерыште ийын моштыдымо 15 ияш рвезе вӱд гыч лектын кертын огыл, кеч пуэн овартыме матрасыште ийын коштын.

7 июньышто Кужэҥер районысо Тошто Йӱледӱр ял воктенысе пӱяште тыгак 9 ияш ӱдыр шке ыштыме шоло дене ийын коштшыжла туткарыш логалын. Кеч пеленже эше тыгаяк ийготан вич икшыве лийыныт.

27 июньышто Волжский районысо Кӱшыл Азъял ден Учимсола ялла кокласе пӱяште 5 ияш йоча вӱдыш пурен каен. Ача-аваштат пырля лийыныт, каненыт, икшыве пуэн овартыме оҥго гыч лектын каен. Очыни, нуно ынде чот чаманат, да  мом ыштет.

Вӱдыш пурен кайыме туткар Моркышто, Волжскышто, Изи Какшан эҥерыште, У Торъял Шукшан эҥерыште да икмыняр моло вереат шоктен. Специалист-влакын ойлымышт почеш, тӱҥ шотышто нине случай-влак  йӱштылаш келыштарыдыме верыште лийыныт. Еҥ-влак огыт пале, могай вӱдыш пурат, йымаке шуҥгалтыт, а пундашыште мо кия – кушеч палет. Вес амал – нуно кочвӱдым подылшо лийыныт.  А икшыве-влак шукышт ийын моштен огытыл да ача-аваштат эскерен огытыл, тӱткылыкышт ситен огыл.

Йӱштылмо сезон тӱҥалтыш гыч чылаже 19 тукар лийын. Чот шокшо шогымат еҥ-влакым вӱд деке шӱкен. Тидын шотышто Марий аварийно-утарыше службо вуйлатышын алмаштышыже Николай Самойловын соцсетьлаште эртарыме вияш эфирыштыже кажне гана ойлымыжым эше ик гана ушештарынем: «Чывылталташ, ийын кошташ, каналташ кумыл илышым шогышаш огыл. Йӱштылаш кумыл лектеш, тидлан лӱмын келыштарыме верыш кайыман. Вӱдым ужын, вигак тушко шуҥгалташ гын, илыш дене чеверласаш лиеш».

Мутлан, Козьмодемьянскыште Юл эҥерыште йӱштылшӧ кок пӧръеҥ Коротни гыч вес серыш ийын каяш шонен пыштеныт. Но варажым вийышт ситен огыл. Изиш гына вӱд пундашеш кодын огытыл, верысе-влак ужын шуктеныт, утарыше-влакым ӱжыктеныт.

А кочывудым подылшылан Н.Самойлов посна каҥашым пуа: «Аракам подылында гын, туткар ынже лий манын, вӱдыш ида пуро. Йолдам нӧртышда, ситен веле».

Весымат кызыт шотыш налаш уло огыл, ГОЧС, ГИМС, МЧС пашаеҥ-влак Йошкар-Оласе йӱштылмӧ верлаште рейдым так арам огыл эртарат. А йӱштылаш чарыме верлаште йӱштылшо-влаклан мутым кучаш логалеш. Чыла протоколым оласе административный комиссийыш колтат. Штрафше 1500 гыч 2000 теҥге марте шуэш.

Светлана Носова