Калмыкийым вуйлатыше дене вашлимаш

22 ноябрьыште Марий Элым вуйлатыше Юрий Зайцев ден Калмык Республикым вуйлатыше Бату Хасиков вашлийын мутланеныт.

Юрий Зайцев Марий Элыш толын коштмыжлан Бату Хасиковлан тауштен да пырля пашам ышташ ямде улмыжым ончыктен.

«Бату Сергеевич, тендам Марий мландыште куанен вашлиям. Тиде тугай мланде, куштыжо мый кызыт пашам ыштем да Мрий Эл калыклан служитлем. Мый илышыштем икмяняр ийым Калмык Республикылан пуэнам да тудо шӱм-чоныштем эрелан аралалт кодеш. Калмыкийым вуйлатыше – мыланем ойыртемалтше уна. Мыланна чыла отрасльыште пырля пашам ыштыме шотышто уло мом каҥашаш. Мемнанм ушен кертше шуко цель ден задаче улыт», - каласен Марий Элым вуйлатыше.

Бату Хасиков Юрий Зайцевлан Марий Элыш толын коштмаш кугу честь да куан манын каласен.

«Тиде тугай кундем, могайжым вуйлаташ тыланда Российын президентше Владимир Владимирович Путин ӱшанен.   Регионым вияҥдыме пашам тендан кузе шуктен толмыдам ме палена. Тидым палемдыме шуэш: Петербургысо тӱнямбал экономический форумын кышкарыштыже ме пырля пашам ыштыме нерген ойпидышым пеҥгыдемденна ыле. Торговльо сферысе гай раш пале направленийлам ме каҥашаш ямде улына. Тачысе кечылан Калмыкий тӱҥ шотышто аграрный регионлан шотлалтеш, мемнан ялозанлык продукцийна экологий велым аклымаште яндар, тудым Россий мучко кумылын налыт»,-–палемден Калмыкийым вуйлатыше.

Регион-влакын вуйлатышышт тыгак туризм, культур да образований сферыште погынышо опыт дене икте-весым палдареныт.

Бату Хасиков республикын национальный тоштерышкыже миен коштмыжым сайлан шотлен шарналтен, марий калыкын да марий мландын историйыштым келгынрак пален налаш кумыл лекмым палемден.

Юрий Зайцев республик-влак коклаште ятыр направлений дене паша шукталтеш манын ешарен.

«Ойпидыш дене келшышын, ме икмыняр отрасльыште палынак ончыко тошкалынна. Кылым ончыкыжат пеҥгыдемдаш да мемнам ушен шогышо икгайлыкым кычалаш тӱҥалына»,– палемден Марий Элым вуйлатыше.

Бату Хасиков Калмыкий калык лӱм дене Марий Эллан умбакыже пеледалташ тыланен.

Марий Эл Республикым вуйлатышын администрацийжын информаций паша пӧлкажын уверже негызеш П.Шакиров ямдылен