Какшан сер койын сылнештеш, вашке эше ик у площадь лиеш

Какшан сер койын сылнештеш, вашке эше ик у площадь лиеш
05.11.2014
Ноябрьын икымше кечылаштыже Йошкар-Оласе Изи Какшан эҥер серыште эше кок тӱвыра объект ешаралтын. Нуным почмаште Марий Эл Республикым вуйлатыше Леонид Маркелов лийын.
 
Иктыже - славян возыктышлан негызым пыштыше, апостол-влак дене тӧр ужмо святой-влак Кирилл ден Мефодийлан памятник. Тудым почмо годым Йошкар-Ола да Марий архиепископ юмын шӱлышым пуртен да торжественный литургийым эртарен. Тидын деч вара Марий Эл Республикым вуйлатыше Леонид Маркелов погынышо-влакым саламлен да палемден: «Марий Элын рӱдолаже веле огыл кажне кечын у сыным налеш. Кундемнажак сылнырак лийже манын, правительстве кажне кечын тырша. Тиде памятникат амал деч посна шочын огыл. Лишыл жапыште Йошкар-Олаште эше ик у площадь ышталтеш. Тудо «Царьградский» маналташ тӱҥалеш...»
 
Вара Леонид Игоревич Кирилл ден Мефодийлан пӧлеклыме шкенжын возымо почеламутшым лудын.
 
Ты памятникым бронзо гыч ыштыме. Кок святой гранит постаментыште кидыштышт азбукым кучен шогат. Коклаштышт ыресым келыштарыме. Кок фигуржат 2,5 метр кӱкшытан. Памятникын авторжо РФ Художник ушемын председательже, калык сӱретче Андрей Ковальчук ты памятникым идалык наре ыштен, почмашке шкежат толын.
Изи Какшан эҥер серыштак ты кечын эше Творческий ушем-влакын пӧртышт почылтын. Тиде церемоний поэтический миниатюр гыч тӱҥалын. А мучашлен тудым Марий Эл Республикым вуйлатыше Леонид Маркелов.
 
- Тиде пӧрт ятыр творческий коллективын пашам ыштыме верже лиеш. Тушто нуно вашлийыт, икте-весе дене кылым ыштат. Артист, архитектор, композитор, писатель-влак... Тиде пӧрт творческий еҥ-влакым у пашалан кумылаҥдаш тӱҥалеш, - палемден тудо.
 
Марий Эл Республикым вуйлатыше творческий ушемыште шогышо-влаклан утларак шкем ончыкташ, талант дене куандараш да тидын дене республикым чапландараш ӱжын. Вара Россий Сӱретче ушемын марий региональный пӧлкажын радамыштыже шогышо скульптор-влак Анатолий  Ширнин ден Сергей Яндубаевлан премийым кучыктен. Нуно А.Е.Котомкин-Савинскийлан памятникшым ыштыме пашалан палемдалтыныт.
 
Йошкар тасмам пӱчмє деч вара Марий Эл Республикын вуйлатышыже Творческий ушем-влак пӧртын пӧлемже-влакым ончал савырнен. 
 
Марий Эл Республик Вуйлатышын мер кыл ден увер виктемже
Кусарымаш - С.Носова (газет "Марий Эл")