Изиш вараш кодшо, но чапле у ий пӧлек

Марий Элым вуйлатыше Юрий Зайцев начар тазалыкан йочалан системный блокым пӧлеклен.

Йошкар-Ола гыч Настя Иванова – икымше классын тунемшыже, но ӱдыр шинчымашым мӧҥгыштыжӧ налеш. Туныктышо-влак тудын пашам йӧратымыжым, шуко палаш тыршымыжым да сай кӱкшытым ончыктымыжым палемдат. Но тичмашын тунемшашлан Настялан инновационный оборудованийым – айтрекерым – шындыман компьютер кӱлын. Тудыжо шинчаончалтышын кушко виктаралтмыжым шотыш налеш да программе-влак дене пашам ышташ – начар тазалыкан икшывылан мутланаш да тунемаш – йӧным ышта. Системный блокым налаш полшаш Настян аваже, Надежда Ивановна, йодын. Марий Элым вуйлатыше ӱдырын тыгай нелылыкыш логалмыж нерген кузе пален налын, туге кӱлешан оборудованийым налаш пунчалын.

11 январьыште Юрий Зайцев Настя да Надежда Ивановна дене вашлийын, нунылан пӧлекым шкежак кучыктен.

«Изиш вараш кодын гынат, тиде у ий пӧлек манын шотлена. Тыланда системный блок кӱлмым пален налмекем, йодмыдам тӱткыш деч посна коден шым керт. Техникын тыгай кӱкшытыш шумыжым, тудым эсогыл шинчаончалтыш дене виктараш лиймым, икшывын илышыжым куштылемдаш, тудлан условийым ышташ йӧн-влак улмым сай велым аклем . Тиде системный блок тыланда полша манын ӱшанем», – манын регионым вуйлатыше.

Надежда Ивановна Юрий Зайцевлан тауштен да ӱдыржын, начар тазалыкан гынат, ушан улмыжо, тунемаш йӧратымыже, чыла уым пален налаш тыршымыже да изи ноутбук дене йӧндымынрак заниматлалтмыж нерген каласкален.

«У ий чудо лийын. Ешланна тиде кугу да вучыдымо пӧлек. Тау. Ме моткоч куаненна», – Ю.Зайцевлан тауштен тудо.

Марий Элым вуйлатыше Настя ден аважым У ий дене саламлен, пиалым да тунеммаште сеҥымашым тыланен.


Марий Эл Республикым вуйлатышын администрацийжын информаций паша пӧлкажын уверже негызеш М.ИВАНОВА ямдылен