13-15 январьыште Йошкар-Оласе «Марий Эл» ий полатыште фигурный мунчалтымаш дене Российын кубокшо верч таҥасымашын 4-ше этапше эртен. Тыгак синхрон мунчалтымаш дене самырык-влак коклаште «Марийские встречи» всероссийский турнир иктешлалтын.
Марий Элыш элнан 42 регионжо гыч 46 команде толын. Спорт мероприятийыште чылаже 1200 еҥ вийжым терген. Спортсмен, тренер-шамычым регион вуйлатыше Юрий Зайцев саламлен. Участник-влакын сылне, ӧрыктарыше выступленийыштым шотыш налын, пагален тауштен.
– Мыланна тыгй кӱкшытан таҥасымашым тыште эртараш – кугу чап. Кум кечыште моторлыкым, чаткалыкым, тыгодым оҥай таҥасымашым ужынна. Тендан кокла гыч кажныже кӱлеш семын тырша, виян спорт койышым ончыкта. Ты чаткалык ден моторлык кугу паша дене кылдалтыныт, сандене сай результатым пуат. Тиде таҥасымашым мый уло кумылын ончем да кугу куан дене сеҥыше-шамычлан пӧлекым кучыктем. Чемпион, сеҥыше улыт, но те чыланат сай результатым ончыктеда, шӱм гыч лекше пиалым тыланем. Тек тендан чыла шонымашда шукталтеш. Тендам уэш унала ӱжына, – манын Ю.Зайцев.
Марий Эл вуйлатыше сеҥыше-шамычлан медальым, кубокым кучыктен да ты йӱла умбакыжат шуйна, фигурный мунчалтымаш дене Россий кӱкшытан таҥасымашлам ончыкшымат республикыште эртараш тӱҥалына манын палемден.
Синхрон мунчалтымаш дене «Марийские встречи» турнирыште спорт мастерыш кандидат-шамыч коклаште икымше верым «Санрайз-1» (Санкт-Петербург) налын. Кокымшыш «Идель» (Татарстан Республике), а кумшо верыш «Юность-юниоры» (Свердловск область) сборный-влак лектыныт.
Спорт мастер-шамыч коклаште икымше «Парадиз» (Санкт-Петербург), кокымшо «Татарстан» (Татарстан), кумшо «Кристалл Айс» (Москва) команде-влак лийыныт.
Синхрон мунчалтымаш дене Российын кубокшо верч таҥасымашын IV этапыштыже «МС (12)» категорийыште эн ончыко «Ямал» (Ямал-Ненецк автоном округ) сборный лектын. Тыгак Краснодар край гыч «Симфония» командым палемденыт.
Марий Эл Республикым вуйлатышын администрацийжын увер паша пӧлкажын уверже негызеш Е.Эшкинина ямдылен
