Илыме вер ешаралтеш – тугеже илыш саемеш

2023 ийыште, ончылгоч шотлен лукмо почеш, Марий Элыште илыме верым чоҥымо показатель 14 процентлан кугемеш.

Марий Эл вуйлатыше Юрий Зайцев Россий Федерацийыште регион-влак вияҥме шотышто правительстве комиссийын президиумжын (штабын) заседанийышкыже ушнен. Заседанийым Россий вице-премьер Марат Хуснуллин видеоконференц йӧн дене эртарен.

Участник-влак РФ субъектлаште илыме верым чоҥымаште могай показательыш шумым каҥашеныт.

Марий Элыште илыме верым чоҥымаш ок изем. Россий Минстройын порученийже почеш республикыште 435,8 тӱжем кв.метр илыме верым чоҥаш палемдыме. Оперативный данныйым ончалаш гын, 2023 ий январь гыч октябрь тылзе марте 435,691 тӱжем кв.м. кугытыш шумо, тидыже 2022 ийын тыгаяк жапше дене таҥастарымаште 103,9 процент, але идалыкаш планын 99,9 процентше лиеш. Ончылгоч шотлен лукмо почеш, 2023 ий мучашлан тиде показатель 496,225 тӱжем кв.м. (113,8%) лиеш.

Аварий лийын кертме лӱдыкшӧ пӧртла гыч еҥ-влакым вес вере илаш кусарымаш умбакыже шуйна. Тиде паша «Илаш йӧрдымӧ илыме верым палынак шагалемдымаш» программын IV йыжыҥже дене келшышын шукталтеш.

Пеҥгыдемдыме йодмаш почеш финансированийын тӱрыс кугытшо – 4 млрд. теҥге утларак, тышеч 3,783 млрд. теҥге Илыме верым да коммунал озанлыкым уэмдаш полшышо фондын средстваже кӱшеш ойыралтеш.

2023 ийлан 652,39 миллон теҥгем (617,02 миллион теҥгеже Фонд гыч) кучылташ палемдыме. Идалык мучаш марте шуко пачеран 7 пӧрт чоҥалтеш, тышеч 167 пачерже вес вере илаш куснышо 443 еҥлан налалтеш. Тугеже, целевой показатель-влак тӱрыснек шукталтыт.

 

Марий Эл Республикым вуйлатышын администрацийжын информаций паша пӧлкажын уверже негызеш Л.СЕМЕНОВА ямдылен