Иктыже – Йошкар-Олаште, весыже – Шернур посёлкышто

Марий Элым вуйлатышын пашажым жаплан шуктышо «Россий экологий компаний» публично-правовой компанийын генеральный директоржо Денис Буцаев дене вашлиймаште республикыштына пеҥгыде коммунальный отходым обрабатыватлыме да утилизироватлыме сферыште кылым кучымо шотышто йодышым каҥашен.

Юрий Зайцевын палемдымыж почеш, регионысо кучем «Экологий» национальный проектым илышыш пуртымылан кугу тӱткышым ойыра: шӱкшакым перерабатыватлаш кызытсе жаплан келшыше инфраструктур ышталтеш. Полигоныш кок пачаш шагалрак отход логалже манын, 2024 ий марте Йошкар-Олаште да Шернур посёлкышто шӱкшакым ойыркалыше комплексым чоҥаш палемдыме. Иктыже идалыкыште 100 тӱжем тонн отходым сортироватлаш тӱҥалеш гын, кокымшыжын идалыкыште 20 тӱжем тонным ойыркалаш куатше ситышаш. Комплекс-влакым чоҥаш 1,5 миллиард теҥге ойыралтеш. Проект-влак илышыш пурталтыт гын, погынышо уло шӱкшак гыч 75 процент утлажым ойыркалаш йӧн лиеш. Вашлиймаш годым тыгак тиде отрасль дене кылдалтше моло йодышымат каҥашыме.

Ушештарена, тений идалык мучаш марте пеҥгыде коммунальный отходлан 450 у контейнерым налаш палемдыме. Отрасль дене кылдалтше реформо тӱҥалтыш гыч тудыжо республикыштына 12 тӱжем гыч 16 тӱжем марте шукемын, тыгак коммунальный озанлыкыште кучылталтше технике уэмдалтеш.


Марий Эл Республикым вуйлатышын организаций да аналитике виктемжын уверже негызеш Г.Кожевникова ямдылен