Икте-весын пашажым саемдаш полшышаш

30 октябрьыште Коми Республикысе академический филармонийыште эртаралтше «Танцуй и пой, моя Россия!» фестиваль жапыште Марий Элын тӱвыра, савыктыш да калык-влакын пашашт шотышто министрже Константин Иванов ден Коми культур да архив паша министрын сомылжым жаплан шуктышо Мария Балмастова ойпидышым подписатленыт.

Ты документ кугыжаныш тӱвыра учреждений-влак коклаште (декоративно-прикладной искусство, калык художественный промысел, театр-концерт да библиотеке паша шотышто) кылым саемдаш полша.

М.Балмастован палемдымыж почеш, Марий Эл ден Коми республикла ончычсекак икте-весе дене келшен пашам ыштат, тиде ойпидыш сотемдарыме пашаште кылым эшеат саемдаш полшышаш.

Октябрьыште Йошкар-Ола гыч Республикысе курчак театр Комиште «В гостях у Мойдыся» фестиваль-форумышто лийын, а ноябрьыште тусо артист-влак мемнан деке икымше гана курчак театр-влаклан эртаралтше тӱнямбал кӱкшытан «Яндар» фестивальыш толыт.

Тыгак 2024-2025 ийлатше Коми гыч Национальный музыкально-драматический театр Финн-угор калык-влакын «Майатул» фестивальыште мастарлыкым ончыктышаш, тусо Академический опер да балет театр ден Воркутасе Б.А.Мордвинов лӱмеш драме театр Э.Сапаев лӱмеш опер да балет академический театрыш гастроль дене толшаш улыт.

Тоштер ден библиотеке-влакынат пашашт воранен кайышаш.


А.Байкова