Икшывылан – йочасад, студентлан – часамла

Икшывылан – йочасад, студентлан – часамла
23.10.2014
Марий Элым вуйлатыше Л.Маркелов Медведево район Шойбулак селаште йочасадым чоҥышаш вереш шарнымашан кӱм пыштыме лӱмеш торжественный церемонийыште лийын. – Медведево районышто йоча-шамыч шукырак шочаш тӱҥалыныт, илыме вер ятыр чоҥалтеш, тугеже йоча образовательный учреждений-влак кӱлеш лийыт, - каласен тудо погынышо калык ончылно. – А властьын задачыже – икшыве-шамыч жаплан келшыше условийыште кушкышт да ушым погышт манын, чылажымат ышташ.
 
У зданий кок пачашан лиеш, ончыкыжо куд группыш 110 утла йоча толшаш. Тушко пурымо верыште пандусым келыштарыме, сандене тышке тӱрлӧ икшывым налын кертыт. Тыште медицине кабинет, физкультур ден музыкальный зал-влак, методический пӧлем, молат лийыт.
 
Чоҥышо-влак дене вашлийме годым Л.Маркелов зданийым нӧлтымӧ графикым пеҥгыдын шукташ да чапле качестве дене чоҥаш йодын. А нунышт, ача-ава-шамычын йочасадым чытен-чытыде вучымыштым умылен, шушаш кеҥежлан сдатлаш сӧрат. 1 октябрь гыч тудо икшыве-влакым вашлийшаш.
 
Йочасадым чоҥымо, оборудованийым шындыме да моло семын пойдарыме пашалан 71 миллион теҥге кая. Тиде районышто пытартыш ик ият пелыште чоҥымо кумшо дошкольный учреждений лиеш. Ончыкыжо Силикатный ден Знаменский поселкылаште нӧлташ документ ден проект ямдылалтыт.
 
Марий кугыжаныш университетын студентше-влак студенчествылан, шинчымашым налме  чумыр пашалан да просвещенийлан полшен шогышо Св.Татианан часамлажым чоҥымо нерген мутым луктыныт ыле. Журналист-влак тидын шотышто республикым вуйлатышын шонымыжым пален налнешт ыле.
 
- Тиде – ӱчашымашым лукшо йодыш, молан манаш гын южо еҥ черке ден часамлам чоҥаш огеш кӱл, весышт кӱлеш маныт. Но мемнан студент-влак молодец улыт. Ме йодмыштым шуктена, - каласен Л.Маркелов.
 
Марий Эл Республик Вуйлатышын мер кыл ден увер виктемже
Кусарымаш - А.Андреев (газет "Марий Эл")