Марий Элыште СПИД-рӱдерын лабораторийжым модернизироватлен шуктымо.
11 январьыште тудын технологический оборудований дене пойдаралтмыжым Марий Элым вуйлатыше Юрий Зайцев аклен.
Медицине тӧнежын тӱҥ врачше Рафаэль Шигапов регионым вуйлатышылан кабинет-влакым ончыктен, капитально олмыктымо да шыҥдарыме деч вара лабораторийын у йӧнжӧ-влак нерген каласкален. Модернизацийым 2021 ийыште федеральный бюджет гыч ойырымо средства кӱшеш тӱҥалме. Чумыржо 49 миллион теҥгеаш микробиологический оборудованийым налме. Республикын бюджетше гыч ойырымо окса дене нуклеиновый кислота, клетке да белок-влакым эрыкташ 8 миллион теҥгеаш магнит частице-шамычын процессорыштым шындыме. Эше 17,5 миллион теҥге дене лабораторийын помещенийже-влакым, ты шотыштак вентиляций, олтымо, вӱдым ситарыме да канализаций системе-шамычым, пожар сигнализацийым, капитально олмыктымо.
Республикын тазалык аралтыш министрже Марина Панькован палемдымыж гыч, лабораторийын производительностьшо палынак кугемын. Ешарен шыҥдарыме да олмыктымо пашам шуктымо дене ятыр микробиологический шымлымашым рӱдераҥдаш да медицине организаций-влакын йодмыштым шукташ йӧн лийын. Тылеч посна модернизироватлыме лабораторийыште пашам ышташат палынак каньыле.
«Тиде Юл кундем федеральный округышто ик эн виян лабораторий. Кызыт тудын йӧнжӧ моткоч кугу. Ме кеч-могай инфекцийым рашемден кертына», – увертарен М.Панькова.
Марий Элым вуйлатыше кызытсе оборудованийын пашам саемдымыжым да куштылемдымыжым, инфекцийым писын рашемдаш да калыклан эпидемиологий велым сай илышыжым ышташ полшымыжым палемден да лабораторийын пашаеҥже-влаклан шкем чаманыде тыршымыштлан тауштен.
Марий Эл Республикым вуйлатышын администрацийжын информаций паша пӧлкажын уверже негызеш М.ИВАНОВА ямдылен
