Марий Элым вуйлатыше Юрий Зайцев геральдике совет нерген положенийым да тудын у составшым пеҥгыдемден. У составыш кучемын еҥже ден профильный специалист-влак пуреныт.
Геральдике совет Марий Элым вуйлатыше пелен пашам ышта, ой-каҥашым пуышо органлан шотлалтеш. Тудо Республикын официальный символжо да моло ойыртемалтше-знак-влакым ыштыме да кучылтмо дене кылдалтше йодышлам онча.
Советым Марий Эл правительстве председательын икымше алмаштышыже Михаил Васютин вуйлата. Составыш тыгак Марий Элым вуйлатышын администрацийжым вуйлатышын алмаштышыже Рудольф Золотарёв пурен. Тудо геральдике советыште председательын алмаштышыжын пашажым шукташ тӱҥалеш. Секретарьлан Марий Элым вуйлатышын кугыжаныш-правовой управленийжын вӱдышӧ советникше Александр Бурмистровым пеҥгыдемдыме. Кучем орган-влак деч советыш республикын элкӧргӧ политике, верысе самоуправленийым вияҥдыме да юстиций шотышто министр Антон Мирбадалев пурталтын.
Геральдический советыш тыгак В.М.Васильев лӱмеш МарНИИЯЛИ директор Людмила Григорьева, Йошкар-Ола художественный училищын директоржо Борис Маклашин, Россий художник ушемын Марий региональный пӧлкажын председательже Анна Санникова да Российысе юрист-влакын ассоциацийыштын Марий региональный пӧлкажын членже Зосим Эргубаев пуреныт.
П.Шакиров
