Газым яра пурташ тўҥалыт

Газым яра пурташ тўҥалыт
27.07.2021

Марий Элыште сурт марте газ пучым  оксам тўлыде шупшаш еҥ-влак деч йодмашым 26 июль гыч   налаш тўҥалыт. Тиде паша Российын президентше  Владимир Путинын  кўштымыжым шуктымо кышкарыште  шукталтеш. Тыгай порученийым тудо  РФ Федеральный  Погынымашлан посланийым колтымо деч вара пуэн.

Йодмашым налаш  чыла ямде

23 июльышто  Марий Элым вуйлатыше Александр Евстифеев «Газпром межрегионгаз Йошкар-Ола» ООО-н калыкым обслуживатлыме рўдерышкыже миен коштын да сурт марте газ пучым  оксам тўлыде шупшаш еҥ-влак деч йодмашым налаш тўҥалаш ямдылалт шумым терген.

Марий Элыште 7 тўжем  наре суртыш  газым пуртен шукташ йöн уло. Кызытсе жаплан шотлымо почеш, мланде участкыже марте газым намиен шукташ кумылан улмыжым 3 тўжем утла еҥ ончыктен. Тыгай еҥ-влакын чотышт йодмашым пуэн шуктымек веле  йöршешлан рашемеш.

Республикым вуйлатыше операционный залым ончен савырнен, йодмашым пуымо процедурым шкежак тергыме шот дене эртен да могай требованийым шукташ кўлмö нерген оператор дене мутланен. Тидын годым Александр Евстифеев газым пуртышашлан   технический условий улмым кузе рашемдаш лийме нерген умылкален.

Эн ончычак документ-влакым перечень дене келшышын пуыман. Тиде переченьышкыже пурат: паспорт, мланде участкылан праван улмым ончыктышо документ-влак, СНИЛС, газым пуртышаш объект, ситуационный да пöртысö пачаш еда ямдылыме план.

«Газпром межрегионгаз Йошкар-Ола» ООО-н генеральный директоржо Александр Ерёмин дене мутланымыж годым  республикым вуйлатыше клиентлан чыла услугым комплексно пуаш кўлмым палемден, а тидланже специалистын кидыштыже чыла данный лийшаш але тудо кўлешан информацийым  Технический инвентаризаций бюро гыч налын кертшаш.

Пытартышлан Александр Евстифеев компанийын  сайын пашам ыштымыжым палемден.

Марий Элыште газым пуртымо уровень 90 наре процентыш лишемеш.Тиде паша чулымын шукталтеш. Ончыкыжат тыгак пашам ыштыза, каласен республикым вуйлатыше.

2002-2020 ийлаште «Газпром» ПАО Марий Элыште газым пурташ 3 миллиард утла теҥге инвестицийым ойырен. Республикын правительствыже ден  «Газпром» ПАО 2021-2025 ийлан Марий Эл Республикылан  газым ситарен шогымо да газым пуртымо пашам вияҥден колтымо  программым пеҥгыдемденыт.  Тудын дене келшышын, «Газпром межрегионгаз» газым шеледен колтен шогышо объектлам чоҥаш 4 миллард теҥгем колтышаш. «Газпром» ПАО газым колтен шогымо объектлам, тидын шотыштак газ пуч-отвод-влакым да ГРС-ым, пужен уэмдаш  120 миллион теҥгем  ойырен. Тудын  тыгак илем-влак кокласе  газ пучым  шупшаш  регионлан ойырымо инвестицийже 458 миллионтеҥгеш шуэш.

2021 ийыште  Марий Элыште  Звенгигово, У Торъял да Морко районлаште 5 объектлан проектым ышташ палемдыме, Советский, Оршанка да Звенигово районлаште  4 объектым чоҥаш тўҥалме.

 

Президентын кўштымыжым шуктена

«Газпром межрегионгаз Йошкар-Ола» ООО-н калыкым обслуживатлыме рўдерышкыже миен коштмо деч вара Марий Элым вуйлатыше Александр Евстифеев газым пуртымо да «канде» топливым ситарен шогымо йодышла дене  совещанийым эртарен.

Тудо тыге палемден: Россий президент Владимир Путинын газым еҥ-влакын суртышт марте газ пучым оксам тўлыктыде шшупшмо шотышто кўштен каласымыжым  шуктышашлан пашам вияҥден колташ кўлеш. Мемнан дене клиентский рўдер пашам ышташ тўҥалын. Тиде услугым  «Газпром межрегионгаз Йошкар-Ола» пуэн шога. Республикыште газым пуртымо  паша сайын шукталтеш, тудым умбакыжат сайын  шуяш кўлеш. Президентын  кўштымыжö шукталтшаш, каласен. Александр Евстифеев.

Республикын промышленность, экономический вияҥмаш да торговло министрже  Станислав Крылов  тыге палемден: 2019 ий годсек  Марий Элыште республиткысе 32 илемыште 162 км газ пучым шупшмо, 449 суртыш  газым пуртымо, 9 котельныйым  пўртўс газыш кусарыме. 2021-2023 ийлаште 10 муниципальный образованийыште илем-влак кокласе да нунын кöргысо 232 км  газ пучым шупшаш  палемдалтеш. Тидлан 3,5 миллиард теҥге кая, тышеч 3,3 миллардшым  «Газпром» ПАО ойыра, каласен министр.

Але марте пуртен шуктыдымо суртлашке газым пурташ 868 миллион теҥге кўлеш лиеш, каласен «Газпром межрегионгаз Йошкар-Ола» ООО-н генеральный директоржо Александр Еремин.

«Чыла требованийым пеҥгыдын шукташ йодам. Тиде  Россий президентын кўштымыжö, айста тыге кутырен келшена: индеш тылзе пашам ыштыме деч вара шумо паша лектышнам  ончалын лектына. Палемдымыш шуына манын ўшанем»,- каласен пытартышлан Александр Евстифеев.

Марий Эл Республикым  вуйлатышын организаций да аналитике виктемжын  уверже негызеш П.Шакиров ямдылен