Марий Эл вуйлатыше Юрий Зайцев «Единый Россий» политический партийын Россий Федарацийысе субъектлаште социальный газификаций шотышто поро тӱҥалтышыжым шуктымо йодыш дене совещанийыште видеоконференций йӧн дене лийын.
«Единый Россий» Россий политический партийын председательже, Россий Федерацийысе лӱдыкшыдымылык совет председательын алмаштышыже Дмитрий Медведев совещанийым почмо ойыштыжо палемден: илемлаште газым ешарен пуртымаш программе – «Единый Россий» партийын пытартыш ийлаште темлыме кӱлешан пашаже, да тудым элнан президентше Владимир Путин сайлан шотлен пеҥгыдемден.
Совещанийыште газым ешарен пуртымо программе 2021-2022 ийлаште кузе шукталтме, суртлашке, медицине ден тунемме организацийлашке 2023 ийыште газым ешарен пуртымо план да тыгодым посна тӱшка граждан-влаклан полышым пуымо мере нерген каҥашыме. Россий президентын пунчалмыж дене ты программе умбакыжат шуйнаш тӱҥалеш.
Газым ешарен пуртымо программым шуктен толмо шот дене Марий Эл РФ субъект-влак коклаште 12-шо верым налеш. Тачысе кечылан 510 илемыште 4290 сурт деке газ пучым шупшаш йӧн уло, тушечын 2483 сурт деке тидым ыштыме.
Тидлан полыш шот дене республикыште газым пурташ налме кредит почеш процент ставкын ужашыжым субсидироватлаш, роскотын 100 тӱжем теҥге марте ужашыжым петырышашлан пособийым налаш йӧн уло. Тылеч посна шуко йочан ешлан ава капитал семын социальный полышым пуымо ешартыш мерым ыштыме.
Совещаний жапыште Юрий Зайцев программын кӱлешан улмыжо да, ты йӧн дене республикыште шукырак еҥ пайдаланен кертше манын, условийым ышташ кӱлмӧ нерген палемден.
Марий Эл Республикым вуйлатышын администрацийжын информаций паша пӧлкажын уверже негызеш Ю.Исаков ямдылен
