Федераций Советын комитетлаштыже каҥашеныт

Марий Элым вуйлатыше Юрий Зайцев Федераций Советын Федеративный ышталтмаш, региональный политике, верысе самоуправлений да Йӱдвелын пашаж шотышто комитетшын председательже Андрей Шевченко да тудын икымше алмаштышыже Владимир Городецкий дене вашлиймаште, тыгак Комитетын кумдаҥдыме заседанийыштыже коммунал ден инженерный инфраструктурым вияҥдыме йодышлам нӧлталын.

Андрей Шевченко Субъектын кечыжым эртараш Марий делегацийын сайын ямдылалтмыжым палемден. Тидлан кӧра пунчалын проектышкыже ондак радамлын каҥашыме тӱҥ йодыш-влак пуреныт, каласен Комитетын председательже да тыге ешарен: нунын дене Валентина Матвиенком паладарена да нуно иктешлыше документын негызышкыже савырнат.

Марий Элым вуйлатыше Федераций Советын 2018 ийыште лукмо пунчалжын пунктшо-влакым шуктымо нерген каласкален да тыге палемден: тушто ончыктымо 90% утла мероприятийым шуктымо, молыжым шкеак контрольышто кучем да нунымат шуктена.

Юрий Зайцев тыге ешарен: 2023 ийыште Федераций Советын   пунчалышкыже калыкым тургыжландарыше, эн ончычак ЖКХ сфере дене кылдалтше   пеш кӱлешан йодыш-влак пурат.

Комитетын кумдаҥдыме заседанийыштыже Юрий Зайцев Федераций Советын площадкылаштыже Марий Эл Республикын кечылажым эртараш да тудын шумо сеҥмашыж дене палдараш, регионлан пеш кӱлешан йодыш-влакым каҥашаш йӧным пуымылан тауштен.

«Ме шумо сеҥымашнам, тургыжландарыше йодыш ден проблемынам каҥашынена. Мемнам умыледа да пайдалын пырля пашам ыштена манын ӱшанем. Ме умылена: проблемына-влак системный улыт, нуно мемнан регионым веле огыл, пӱтынь элым тургыжландарат. Нуным лач тачак тӧрлаш кӱлеш манын огына ойло, ме вучалташат ямде улына. Тыште мемнам умылышт манын шонена, тидыже эн кӱлешан»,– каласен Юрий Зайцев.

Комитетын заседанийыштыже федеральный кучем орган-влакын вуйлатышышт ден представительышт лийыныт, нуно «Илыме вер да оласе йырвер кумдык» национальный проектым шуктымаште да региональный вияҥмашын ик эн кӱлешан йӧнжым – инфраструктурный бюджетный кредитым – кучылтмаште республикын шумо сеҥымашыжым ик гана веле огыл палемденыт.

Погынышо еҥ-влак Йошкар-Олаште вӱдым ситарен шогымо объект-влакым чоҥымо, эҥер серым тӱзатыме, шуко йочан еш-влаклан пӧртым чоҥашышт ойырымо мланде участкылаште коммунал ден корно инфраструктурым ыштыме, тыгак шуко пачеран пӧртлаште лифт-влакым вашталтыме шумлык мероприятийлам каҥашеныт.

Нине йодыш дене докладым республик правительстве председательын алмаштышыже Александр Сальников ыштен.

Регионын ятыр инициативыжым Российын Минстройжо, Территорийлам вияҥдыме фонд да «Дом.РФ» АО сайлан шотленыт.

Ххх

24 октябрьыште Марий Элым вуйлатыше Федераций Советын Бюджет да финанс рынке комитетшын кумдаҥдыме заседанийыштыже лийын. Тушто Россий Федерацийын субъектше-влак бюджетыштым балансироватлаш йӧным ыштыме йодышлам онченыт.

Республикым вуйлатыше Комитетын председательже Анатолий Артамонов дене вашлиймаште проблемный йодыш-влак нерген каласкален, тидын годым образований объект-влакым чоҥымо пашалан кугу тӱткышым ойырен. Комитетын кумдаҥдыме заседанийыштыже тудо регионлан тӱткышым ойырымылан тауштен да финанс йодыш-влакым тарватен.

Республикын финанс министрже Алексей Торощин докладым ыштен. Марий Элын бюджет политикыже региональный бюджет системым балансированныйым да ӱшанлым ыштымашке виктаралтын манын. Тудын мутшо почеш, республикын консолидироватлыме бюджетшын налог да налог огыл доходшо пытартыш 5 ийыште 14,3 миллиард теҥгелан але 1,7 гана кушкын. Тидын годымак федеральный кучем орган-влакын полышышт деч посна тӧрлен кертдыме ятыр проблеме уло, каласен министр.

Федераций Совет председательын алмаштышыже Константин Косачев Марий Эл правительствын бюджетым балансироватлаш йӧным ыштыме шотышто тыршымыжым кӱкшын аклен.

Бюджет да финанс рынке комитетын председательже Анатолий Артамонов Марий Элын сеҥымашыжым палемден, кызыт регион-влак РФ президент Владимир Путинын тӱҥалтышыж почеш шуктен толмо программе-влаклан кӧра кугу полышым налыт манын.

Заседанийыште тыгак пеш кӱлешан ятыр моло йодышым каҥашыме.

 

Марий Эл Республикым вуйлатышын администрацийжын информаций паша пӧлкажын уверже негызеш П.Шакиров ямдылен