Эше ик вӱтам чоҥен шуктымо

Эше ик вӱтам чоҥен шуктымо
11.07.2014
Республикым вуйлатыше Л.Маркелов Кужэҥер районысо Иштымбал ялыште «Акашевский» сурткайык фабрике» ООО-н сурткайыкым ончен куштымо комплексшым почмаште лийын.
 
Ты ушемын шымше черет инвестиций проектше почеш латкуд вӱтам ушышо кандаш корпусым чоҥен шуктымо. Республикым вуйлатыше Л.Маркелов тудым почмашке погынышо калыкым ты кугу событий дене саламлен да палемден: пытартыш пел ийыште тиде район промышленный производствын рӱдышкыжӧ савырнен. Вет Кужэҥер мландыштак 1 апрельыште «Акашево» агрохолдингын сурткайыкым перерабатыватлыме куатле заводшым пашашке колтымо. «Ялыште илыш вашталтше манын шонем. Сандене ме налогым тӱлышӧ предприятий-влакым чоҥена. А тидыже корным, йочасадым, школым, спорт комплексым, ФАП-ым да молымат нӧлташ йӧным пуа. Тидым ме кызытат ыштена. Но бюджетыш доход шукырак пурымо годым социальный учреждений-влакым чоҥымо паша утларак воранен кая», - каласен Л.Маркелов.
 
Кужэҥер район администраций вуйлатыше С.Михеев тыге каласен: «Районыштына «Акашево» агрохолдингын объектше-влак чоҥалтме дене паша вер, бюджетыш доход пурымо да инвестиций толмо йодышым рашемдаш корно почылтеш. Республикын правительствыжын полшымыж дене икмыняр ялышке корным шараш, Йӱледӱрыштӧ йочасадым чоҥаш, тыгак верласе калыкын йодмыж почеш кундемым вияҥдыме кум проектым илышыш шаҥдараш тӱҥалыт. Тений Токтайбеляк да Тумньымучаш селалаште ФАП-влак почылтыт, Руш Шойышто кок пачашан чапле школ шке омсажым почеш».
 
«Акашевский» сурткайык фабрике» ООО-н генеральный директоржо Н.Криваш у объект нерген каласкален. Тылеч вара уна-влак, тыгак погынышо калык ик вӱтам ончен савырненыт. Жаплан келшыше оборудований куандарыде кертын огыл. У комплексыште иканаште 1,5 миллион вуй сурткайыкым ашнаш, талукышто 23 тӱжем тонн шылым ямдылаш тӱҥалыт. Тыгодым 82 паша вер ышталтеш. Инвестицийын кугытшо – 2 миллиард утла теҥге. Тений агрохолдинг сурткайыкым ашныме эше кандаш фабрикым пашашке колта.
 
Марий Эл Республик Вуйлатышын мер кыл ден увер виктемже
Кусарымаш - В.Смоленцев (газет "Марий Эл")