Чыла ола ден районышто кумдаҥдат

Илалше ийготан граждан ден инвалид-влакым кужу жап ончымо системе шотышто проектым Марий Элын чыла олаж ден районыштыжо кумдаҥдат.

Тидым 16 ноябрьыште республикышкына паша дене толын коштмыжо да регионым вуйлатыше Юрий Зайцев дене мутланымыж годым Россий Федерацийын паша да социальный аралымаш министржын икымше алмаштышыже Ольга Баталина увертарен.

Марий Элыште илалше еҥ ден инвалид-влакым кужу жап ончымо системым ыштыме шотышто пилотный проектым илышыш тений гыч пурташ тӱҥалме. Кызыт социальный услугым вич муниципалитет гыч 200 утла граждан налеш. Шушаш ийын системым чыла олаште да районышто пуртат, да тушко 2 тӱжем марте еҥ ушнен кертеш, палемден О.Баталина.

Ю.Зайцев кӱлешан улмыжым шукертак пеҥгыдемдыше тиде социальный мере дене пайдаланаш кумылан еҥ-влакын шуко улмышт нерген каласкален.

«Мыланем социальный блок – ик эн ончыч решатлаш палемдыме задаче. Президентлан лачшымак тиде программе нерген радамленам, тудо улмыж деч посна эше вияҥже манын йодынам. Программе посна тӱткышым йодшо еҥ-влаклан моткоч пайдале да кӱлешан», – манын регионым вуйлатыше.

О.Баталина марий мландыш пагален ӱжмылан тауштен да республик кучемын социальный аланым вияҥдаш, тӱрлӧ проектым илышыш чолган пурташ тыршымыжым палемден.

«Республикын кум ияш бюджетше социальный пашашке виктаралтын. Чыла обязательстве шукталтеш, тыгодымак республикын пилотный проектлашке чолган ушнымыжым ужына. Социальный политике илалше ийготан граждан ден инвалид-влаклан ик эн ончыч тӱткышым ойырымо да полшымо дене кылдалтын, сандене тыште у инструмент ден йӧн-шамыч кучылталтыт. Нуно моткочак кӱлешан улыт, молан манаш гын калыкын илышыжым сай велыш вашталтат. Те президент деке, Паша да социальный аралымаш министерствыш йодмаш дене лектында. Проектым 2023 ийыштат шуйымо да республикын чыла олаж ден районыштыжо кумдаҥдыме нерген тӱҥалтышда дене келшыме. Шушаш ийын тыгай полышым налше граждан-шамычын чотышт палынак кугемеш», – манын О.Баталина.

Марий Элыште 2022 ийыште кужу жап ончымо системым ыштыме шотышто проектым илышыш пурташ федеральный бюджет гыч 55 миллион утла теҥгем ойырымо. Кызыт социальный обслуживанийын лӱмын ямдылыме пашаеҥже-влак 210 еҥым мӧҥгыштышт да 137 гражданым стационар организацийлаште чылт яра ончат.

Системым илышыш пуртымо дене республик социальный веле огыл, тыгак экономический пайдам налеш, молан манаш гын у паша вер-влак лектыт, да налог базат кугемеш.

Пилотный проектым илышыш пуртымо йӧн-влакым да социальный пашам шуктымашке виктаралтше моло йодышым Марий Элым вуйлатыше Юрий Зайцев ден Россий Федерацийын паша да социальный аралымаш министржын икымше алмаштышыже Ольга Баталинан эртарыме совещанийыште лончылымо.


Марий Эл Республикым вуйлатышын организаций да аналитике виктемжын уверже негызеш М.ИВАНОВА ямдылен