Чоҥат – тугеже илыш саемеш

Марий Эл вуйлатыше Юрий Зайцев Россий чоҥымо, илыме вер да коммунал озанлык министр Ирек Файзуллин дене вашлийын. Совещанийыште «Илыме вер да оласе среда» национальный проект дене келшышын, илыме верым да инфраструктур объект-влакым чоҥымо йодышым каҥашеныт.

Кодшо ийын республикыште 435,9 тӱжем квадарат метр сай качестван у илыме верым чоҥымо, тидыже план почеш палемдыме деч 13 процентлан шукырак. «Марий Эл Республикыште у пӧрт-влакым нӧлташ, аварий лӱдыкшан жилфонд гыч граждан-влакым вес вере илаш кусараш, тыгак социальный, коммунальный да инженерный инфраструктурым чоҥаш яра кийыше мландым кучылтмо паша сайын шукталтеш. Кугу олалаште да элнан мӱндыр луклаштыжат калыкын илышыжым саемдыме темпым мӧҥгештарыман огыл», – каласен РФ чоҥымо да ЖКХ министр Ирек Файзуллин.

Россий президентын кӱштымыж почеш коммунальный инфраструктурым уэмдыме шотышто кугу паша каен шога. Национальный благосостояний фондын средстваж гыч Марий Эллан Йошкар-Олаште шокшым пуышо объект-влакын реконструкцийыштым ышташ пуымо йодмаш почеш оксам ойырат.

– «Юлым тазаҥдымаш» региональный проект кышкарыште палемдыме меропритяий-влакым шуктымо шотышто шке ӱмбак налме обязательстве-влакым регион сайын шуктен толеш. Российысе регион-влак коклаште ончылно улына. Кучылтмо вӱдым эрыктыше сооружений-влакым чоҥымаш да уэмдымаш вӱд ресурсым – республикын тӱҥ поянлыкшым – арален кодаш да кумдыкым вияҥдаш йӧным пуат, – палемден Марий Эл вуйлатыше Юрий Зайцев.

Кодшо ийыште канализацийым эрыктыше сооруженийын кок объектшым чоҥымо. Тидлан федеральный бюджет гыч ойырымо 430 миллион наре теҥге оксам тӱрыснек кучылтмо. 2023–2024 ийлаште 4 тыгай объектым чоҥаш палемдыме, тышеч 2-шо кодшо ий гыч куснен, а 2-шо – у. Тений ыштен шуктышаш объект-влакым налаш гын, нунын чоҥымо да монтаж пашаштлан контрактым пеҥгыдемдыме.

Олалаште да ял шотан илемлаште парк, кудывече, йоча да спорт площадке-влакым тӱзатымашат граждан-влакын илышыштым саемдыме нерген ойла. «Илыме вер да оласе среда» нацпроектын «Оласе средам чыла шотыштат йӧнаным ыштымаш» федпроект почеш 2023 ийыште Марий Эл мучко 45 кумдыкым тӱзаташ палемдыме: 30 общественный да 15 кудывече, чоҥымо да монтаж пашам тӱҥалме.

Россий Минстрой Социально-экономический вияҥмаш индивидуальный программе (ИП СЭР) Марий Элыште кузе шукталт толмылан вуйын шога. Тиде программе почеш 2022 ийыште Волжск оласе рӱдӧ больницын азам ыштыме отделенийжын зданийжым, икымше ден кокымшо пусковой комплекс-влакым чоҥымо.

Марий Эл Республикым вуйлатышын организаций да аналитике виктемжын уверже негызеш Л.СЕМЕНОВА ямдылен