Александр Евстифеев – 4-ше верыште

Александр Евстифеев – 4-ше верыште
04.07.2017
Марий Эл Республик вуйлатышын пашажым шуктышо Александр Евстифеев Россий губернатор-влакын репутацийышт шотышто июньысо рейтингыште  4-ше верым айла. А Юл кундемысе федеральный округысо коллегышт-влак коклаште икымше лийын.
 
Рейтингым репутацийым аклыше Pravdaserm.com (http://pravdaserm.com/) сервис чумырен. «Мартыште республик вуйлатышын репутацийже 100 гыч 34 балл дене аклалтын. Александр Евстифеев тиде  показательым палынак, кок пачаш дечат утлараклан  – 82 балл марте - кугемден да репутаций рейтингыште 4-ше верыш лектын. Эксперт ден политолог-влакын акым пуымышт дене келшышын, губернатор-влакын национальный рейтингыште республик вуйлатышын пашажым шуктышо 54-ше верым айла. Тидын годым эсогыл эн кугу эксперт шонымаш показатель-влакын математический анализыштлан чӱчкыдынак келшен огеш тол», - палемдат эксперт-влак.
 
Шымлымашым эртарыме годым Интернет дене пайдаланыше-влакын регион вуйлатыше-влак деке лояльный улмо шотышто данныйышт, губернатор-влак нерген савыкталтше статья-влак шотыш налалтыныт. 
 
Губернатор-влакын хит-парадышт тыгайрак:
 
1. Ярославский областьын губернаторжо Дмитрий Миронов
 
2. Дагестан Республикын вуйлатышыже Рамазан Абдулатипов
 
3. Архангельский областьын губернаторжо Игорь Орлов
 
4. Марий Эл Республик вуйлатышын пашажым шуктышо Александр Евстифеев
 
5. Москван мэрже Сергей Собянин.
 
Юл кундемысе федеральный округысо коллегыже-влак коклаште тиде шымлымаште Пензенский областьын губернаторжо Иван Белозерцев 11-ше верыште, 23-шо верыште - Татарстан Республикын президентше Рустам Минниханов, 27-ше верым пошкудо Киров областьын губернаторжо Игорь Васильев айла.
 
Марий Эл Республик Вуйлатышын мер кыл ден увер виктемже
Кусарымаш - Л.Камалетдинова (газет "Марий Эл")